Россия ва Украина «25 га 25» формуласи бўйича асирлар алмашди

Россия ва Украина Бирлашган Араб Амирликлари (БАА) воситачилигида 15 январ, чоршанба куни «25 га 25» формуласига кўра асирлар алмашди. Мамлакат президенти Володимир Зеленскийнинг сўзларига кўра, 24 нафар ҳарбий хизматчи Украинага қайтган, улар орасида Мариупол ва "Азовстал" ҳимоячилари, шунингдек, Россия Федерациясининг Курск областида жанг қилган Украина Қуролли кучлари аскарлари ҳам бор. «Қайтарилганлар орасида Киев областида асирга олинган ва россияликлар томонидан ноқонуний ушлаб турилган тинч фуқаро ҳам бор», — дея қўшимча қилди Ҳарбий асирлар билан ишлаш бўйича мувофиқлаштирувчи штаб. Россия асирлигидан озод қилинганларнинг энг кичиги 24 ёшда, энг кексаси 60 ёшда.

Россия Мудофаа вазирлиги, ўз навбатида, 25 нафар россиялик ҳарбий Украина асирлигидан Россия Федерациясига қайтганини маълум қилди.

Бу икки давлат ўртасида 2025 йилда биринчи асирлар алмашинуви. Аввалроқ Украина ва Россия 2024 йил 30 декабрда асирларни алмашганди, бироқ томонлар турли рақамларни кўрсатган. Киев маълумотларига кўра, 189 нафар украиналик, жумладан, икки тинч фуқаро ўз ватанига қайтган. Москва алмашиш «150 га 150» формуласи бўйича амалга оширилганлигини даъво қилди.

Зеленский Кимга украиналик аскарларни КХДР ҳарбийларига алмашишни таклиф қилган

12 декабр куни Зеленский КХДР етакчиси Ким Чен Инга Украина қуролли кучлари томонидан Курск областида асирга олинган Шимолий Корея аскарларини Россия асирлигида сақланаётган украиналик ҳарбий хизматчиларга алмаштиришни таклиф қилган. Пхенян ҳали Зеленскийнинг таклифига жавоб бермади.