Исроилда бош вазир Бинямин Нетаняҳу устидан суд жараёни қайта бошланди

Исроил бош вазири Бинямин Нетаняҳу 27 январ куни порахўрлик, фирибгарлик ва жамоатчилик ишончини суиистеъмол қилиш бўйича қайта бошланган учта иш бўйича эшитувларда иштирок этиш учун Тел-Авив округ судига етиб келди, деб хабар беради Channel 12. Бош вазирга нисбатан мазкур айбловлар 2019 йилда қўйилган ва 2024 йил 10 декабрдан бошлаб судда кўриб чиқилмоқда.

Қайд этилишича, Бинямин Нетаняҳу кўрсатма бериши керак бўлган суд эшитувлари бир ойлик танаффусдан кейин қайта бошланган. Адвокатлар уни бошқа санага кўчиришни сўраган, чунки декабр охирларида Исроил бош вазири простата безини олиб ташлаш бўйича операцияни бошдан ўтказган. Эшитувлар бошланишидан олдин адвокатлар учта ишни ҳафтасига биттадан кўриб чиқишни сўраган, аммо суд уларнинг илтимосини рад этган.

Бинямин Нетаняҳуга қўйилган биринчи айблов Bezeq телекоммуникация компанияси бош вазир кўмагида регулятор имтиёзларини олгани билан боғлиқ. Бунинг эвазига компания эгаси Шаул Элович ўзи назорат қиладиган Walla янгиликлар сайтида Нетаняҳу ҳақидаги фақат ижобий мақолалар пайдо бўлишини таъминлаган.

Иккинчиси эса бош вазир ва газеталардан бирининг ношири билан тил бириктирганликка алоқадор. Учинчи айблов версиясига кўра, Нетаняҳу продюссер Арнон Милчан ва миллиардер Жеймс Пакердан ҳомийлик учун қимматбаҳо совғалар олган. Бош вазир барча айбловларни рад этган.

Эслатиб ўтамиз, 2024 йил ноябрда Халқаро жиноят суди Нетаняҳуни ҳибсга олишга ордер берганди. ХЖС Исроил бош вазири Бинямин Нетаяҳу ва собиқ мудофаа вазири Йоав Галантни Ғазо секторидаги ҳарбий жиноятлар ва инсониятга қарши жиноятларда гумонламоқда.