Binance криптобиржаси Ўзбекистонда маҳаллий ҳамкор орқали иш бошлади

Барча интеграция босқичлари якунлангани ва Ўзбекистондаги фойдаланувчилар энди криптобиржадан фойдаланиши мумкинлиги эълон қилинди.

Фото: Getty images

Binance криптобиржаси Ўзбекистонда маҳаллий CoinPay платформаси орқали иш бошлади.

«Барча интеграция босқичлари якунланганини ва Ўзбекистондаги фойдаланувчилар энди Binance криптобиржаси томонидан ишлаб чиқилган ечимдан coinpay.uz/binance қўшма платформаси орқали расман фойдаланиши мумкинлигини мамнуният билан эълон қиламиз», дейилади платформа хабарида.

Қайд қилинишича, энди фойдаланувчилар ўз маблағларини банк карталари ва миллий тўлов тизимлари орқали миллий валютада киритиш ҳамда чиқариш имкониятига эга бўлди.

Binance - рақамли валюта айирбошлаш бўйича онлайн хизмат, блокчейн тизими ва криптовалюта саноати учун инфратузилма провайдери, жумладан рақамли активлар савдоси, инвестициялар, марказсизлаштириш ва инфратузилма ечимлари, тадқиқот, таълим ва бошқа соҳаларни ўз ичига олади. Криптовалюта айирбошлаш хизмати 2017 йилда ташкил этилган ва вақт ўтиши билан бир қатор хизматларни тақдим этувчи блокчейн компаниясига айланди.

2024 йил январ ойида Истиқболли лойиҳалар миллий агентлиги томонидан Binance криптобиржасига нисбатан Ўзбекистон қонунчилиги, хусусан, криптоактивлар айланмаси соҳасидаги қонунчилик талабларини бузганлиги учун жарима қўллаш ҳақидаги қарор қабул қилинган эди. Шундан сўнг, тегишли даъво аризаси Тошкент шаҳар иқтисодиёт судига юборилган.

2024 йил 26 мартидан 7 июнига қадар жавобгар (Binance криптобиржаси) вакили иштирокида давом этган суд жараёнлари якунига кўра, суд агентликнинг аризасини тўлиқ қондириш ҳамда криптобиржадан 300 базавий ҳисоблаш миқдорига тенг бўлган жаримани Ўзбекистон бюджетига белгиланган тартибда ундириш ҳақида қарор қабул қилган.

Binance криптобиржаси суднинг барча талабларини бажарган ҳамда жаримани қонунчиликда белгиланган тартибда Давлат бюджетига тўлиқ тўлаган.

#криптобиржа #Binance #CoinPay