UzAirways'нинг Тошкент–Ню Йорк рейсида чақалоқ туғилди

Парвоз вақтида тўлғоқ тутган аёлга йўловчилар орасидаги шифокор-акушер ва жарроҳ ёрдам берган. Она ўғил фарзандини дунёга келтирган. Самолёт фавқулодда Исландияга қўнган.

Фото: FlightAware

Uzbekistan Airways авиакомпаниясининг 28 январ куни Тошкентдан Ню-Йоркка учган самолёти бортида аёлнинг кўзи ёриди.

Қайд қилинишича, парвоз давомида йўловчилардан бирида туғруқ бошланган. Экипажнинг чақириғига жавобан йўловчилар орасидаги шифокор-акушер ва жарроҳ аёлга ёрдам берган, у ўғил фарзандини дунёга келтирган.

Таъкидланишича, Boeing 787-8 самолёти Исландиянинг Рейкявик шаҳридаги Кефлавик аэропортига фавқулодда қўнган ва аёл билан фарзанди тиббиёт ходимларига топширилган. Улар маҳаллий шифохонага етказилган.

Тайёрлаган: Комрон Чегабоев

#авиакомпания #туғруқ #Uzbekistan Airways