Трамп Европа элитаси орасида тезда «тартиб ўрнатади» — Путин

Россия президентининг таъкидлашича, ЕИ давлатларининг ҳозирги раҳбарларига «жасурлик етишмайди». Трамп эса ўзининг характери билан тез орада тартиб ўрнатади.

Фото: Дмитрий Азаров / Коммерсантъ

Россия президенти Владимир Путин европалик етакчиларга АҚШнинг собиқ президенти Жо Байден кўпроқ ёққани, сайловларда Доналд Трамп ғалаба қозонганидан кейин эса саросимага тушиб қолганини таъкидлади. Путиннинг фикрича, Оқ уйнинг янги раҳбари тез орада «тартиб ўрнатади».

«Нима яхши ва нима ёмон экани, жумладан, гендер сиёсати ва бошқа масалаларда Трамп ўзгача қарашларга эга. Ишонтириб айтаманки, Трамп ўзининг характери, қатъияти билан анча тез тартиб ўрнатади. Ва уларнинг барчаси мана кўрасиз — бу жуда тез содир бўлади — барчаси хўжайинининг оёқлари остида туриб, думини бироз ликиллата бошлайди. Ҳаммаси ўз жойига қайтади», — дейди Россия президенти.

Шунингдек, Путиннинг қайд этишича, ЕИ давлатлари раҳбарларига ўзларидан олдинги етакчилардан фарқли ўлароқ манфаатларини ҳимоя қилишда жасурлик етишмайди. Муқобил сиёсий ғояларни тақиқлайдиган Европа элитасини эса Путин «сиёсий тирмизаклар» деб атади.

АҚШ президенти Доналд Трамп лавозимга киришганидан кейин савдодаги «улкан дефицит» сабаб Европа Иттифоқи давлатлари маҳсулотларига божлар жорий этишини маълум қилди. Унинг айтишича, Евроиттифоқ АҚШ автомобиллари ва қишлоқ хўжалиги маҳсулотларини харид қилмайди, аммо «миллионлаб» ўз машиналарини етказиб беради.