Вашингтондаги авиаҳалокат. Янги тафсилотлар

Вашингтондаги самолёт ва ҳарбий вертолёт тўқнашган авиаҳалокатда барча йўловчилар ва экипаж аъзолари — жами 67 киши ҳалок бўлгани тасдиқланди. Трамп ҳалокатда Байден ва Обамани ҳам айблаган. Фожиадан бир неча кун ўтиб воқеанинг янги тафсилотлари маълум бўлди.

{Yii::t(}

Ўтказиб юбориш 6s

Ўтказиб юбориш

Трамп Вашингтонда American Airlines йўловчи самолёти ва армия вертолёти тўқнашуви оқибатида ҳеч ким омон қолмаганини маълум қилди. Самолётда 60 йўловчи ва экипажнинг тўрт нафар аъзоси, вертолётда эса уч нафар ҳарбий бор эди. АҚШ президенти кун охирида Оқ уйдаги брифингда чиқиш қилиб, Вашингтонда Аmerican Airlines самолёти ва Black Hawk вертолёти ҳалокатидан ҳеч ким омон қолмаганини маълум қилди. У бутун тун давомида кенг кўламли қидирув-қутқарув амалиёти ўтказилгани, унга барча мавжуд ресурслар жалб этилганини билдирган. “Бу мамлакатимиз пойтахтида ва халқимиз тарихида даҳшатли фожиа бўлган қоронғи ва оғриқли кеча эди. Бизни бевақт тарк этган ҳар бир киши учун қайғурамиз”, — деган Трамп.

Қутқарувчилар Потомак дарёсида авиаҳалокат қурбони бўлган 40 кишининг жасадини ҳамда бир неча кишининг жасад қолдиқларини аниқлади, уларнинг айримлари соҳилга чиқиб қолган, деб хабар берилган. Терговчилар ҳисоблашича, самолётдан хавфсиз чиқариб олиш мумкин бўлган жасадларнинг барчаси чиқариб олинган, аммо лайнернинг ҳозирда етиб бориш қийин бўлган дум қисмида яна бир неча кишининг жасад қолдиқлари қолаётган бўлиши мумкин, деган маҳаллий нашрлар ўз манбасига таяниб.

Шунингдек, йўловчи самолётда Россиянинг камида уч фуқароси бўлган. Бу ҳақда РФ ТИВ расмий вакили Мария Захарова маълум қилди. “Элчихонамиз маълумотларига кўра, ушбу самолёт ҳалокати қурбонларининг уч нафарида Россия паспорти бўлган. Яна бир киши, тўртинчи шахсда ҳам Россия фуқаролиги бўлгани ҳақида тахмин бор, бу маълумот текширилмоқда”, — деган у. Шунингдек, самолёт йўловчилари орасида америкаликлардан ташқари Хитой ва Филиппин фуқаролари ҳам бўлган.

Авиаҳалокат қурбонларининг 14 нафари фигурали учиш бўйича спортчилар бўлишган. Шундан йўловчиларнинг олти нафари Бостондаги клубга алоқадор. Аввалроқ Россия нашрлари ҳам самолётда россиялик фигурачилар — 1994 йил Россия терма жамоаси сафида фигурали учиш бўйича жуфтлик баҳсларида жаҳон чемпиони бўлган Вадим Наумов ва Евгения Шишкова бўлганини ёзганди.

Авиаҳалокат рўй берган куни Вашингтондаги аеропортда диспетчерлар етарли бўлмаган, деб хабар берди The New York Times газетаси АҚШ Фуқаро авиацияси федерал бошқармасининг (ФАА) дастлабки ҳисоботига таяниб. Ҳисоботдан маълум бўлишича, навбатчи диспетчерлар сони “кун вақти ва трафик ҳажмига монанд даражада бўлмаган”. Шу куни аеропортдаги навбатчи авиадиспетчер одатда икки киши шуғулланадиган ишларни ёлғиз ўзи бажарган. Аэропорт ҳудудидаги вертолётлар ҳаракатини мувофиқлаштириш учун ҳам, учиб келаётган ва учиб кетаётган самолётлар учун ҳам бир диспетчер масъул бўлган, деб ёзади АP ҳам бошқарма ҳисоботига асосланган ҳолда. Кундузи бу иш билан икки диспетчер машғул бўлган, аммо ҳаракат секинлашгач, бу ишларга биргина диспетчер қолган. Одатда бундай смена соат 21:30 дан бошланган, аммо шу куни диспетчерларнинг роли эртароқ бирлаштирилган.

Армия вертолёти йўловчи самолётга урилганининг сабаби керагидан юқорироқда парвоз қилганидир, деб ёзади Тhe New York Times. Вертолётларга Рейган аеропорти яқинида 61 метрдан юқори бўлмаган масофада учишга рухсат берилади, аммо тўқнашув пайтида у 91 метрдан баландроқда бўлган. Аmerican Airlines бош директори Роберт Исом вертолёт унга келиб урилганида самолёт одатий қўнишни амалга ошираётган бўлганини айтган.

Авиация соҳаси экспертлари анчадан буён Вашингтон устидаги ҳаво кенглиги тиғиз бўлгани туфайли авиаҳалокат рўй бериши мумкинлигидан огоҳлантириб келган.

Экспертларнинг сўзларига кўра, пик вақтларда аэропортдаги тирбандлик ҳатто тажрибали учувчилар учун ҳам муаммо туғдирган, улар бошқа юзлаб йўловчи самолётлар, ҳарбий авиация ҳамда муҳим обектлар атрофидаги тақиқланган зоналарни инобатга олиши керак бўлган.

АҚШ президенти Доналд Трамп авиаҳалокатда ўзидан олдинги президентлар — Жо Байден ва Барак Обамани ҳам айблаган, унинг фикрича, улар томонидан тарғиб қилинган турли хиллик, тенглик ва инклюзивлик сиёсати ҳаво кенглигида муаммоларга олиб келган. У ҳеч қандай далил келтирмаган ҳолда авиадиспетчерлар учун стандартлар жуда юмшоқ бўлганини айтган. Унинг сўзларига кўра, Обама даврида ФАА гўёки ходимларнинг “жуда оқ танли” эканлиги ҳақида директива чиқарганди.

NYT қайд этишича, Трамп журналистлар учун брифинг чоғида қисқача қилиб ҳалокатда армия вертолёти учувчилари айбдор эканини айтган, аммо кейин ишга қабул қилишдаги хилмахиллик дастурлар мавзусига қайтган. Журналистлардан бири ундан терговчилар авиаҳалокат сабабларини ўрганишни эндигина бошлаганига қарамай, нима учун бундай хулосага келганини сўраганида, АҚШ президенти шундай деган: “Мен соғлом фикрлаяпман, кўпчиликда эса бундай эмас. Биз истардикки, бундай ишлар билан доҳиёна одамлар шуғуллансин. Айрим иш турлари учун бизга юқори малакали мутахассислар керак”. Унинг фикрича, авиадиспетчерлар “энг юқори зеҳнга эга одамлар” бўлиши лозим.

АҚШда кеча самолёт билан боғлиқ яна бир ҳалокат содир бўлди.

31 январ куни маҳаллий вақт билан 18:30 да Филаделфия шаҳрида бортида олти киши бўлган тиббий самолёт савдо маркази яқинида қулаб тушди. Портлаш уйлар ва автомобилларга зарар етказган.

Самолётда бўлган 6 нафар инсоннинг ҳаммаси ҳалок бўлган. New York Times маълумотларига кўра, уларнинг барчаси Мексика фуқаролари бўлган. “Бизда тирик қолганлар ҳақида ҳеч қандай маълумот йўқ ва оловнинг интенсивлиги, вайроналар ва ҳалокат турига асосланиб, биз тирик қолганлар борлигига шубҳа қиламиз”, деган Air Ambulance вакили.