Жаҳон | 20:37
2786
6 дақиқада ўқилади

Вашингтондаги отишма саволларни кўпайтирмоқда

Вашингтондаги ҳаяжонли, драматик оқшом, Оқ уй матбуот котибининг тадбир олдидан отилажак ўқларни кутгани ҳамда ўқ овозларидан ҳайратга тушмаган президент. Шанба куни кечқурун юз берган Трамп қатнашаётган тадбирдаги содда отишма воқеаси ростдан содир бўлганмиди ёки бу Трамп жамоасининг навбатдаги саҳна кўринишими? Бу борада саволлар кўпаймоқда.

Ижтимоий тармоқларда 3 кундан бери Вашингтон Hilton меҳмонхонасидаги отишма ҳақида турли-туман фикрлар тарқалмоқда. Ҳеч кимга зарар етмагани ва отишмани амалга ошириш режаси аҳмоқона экани инобатга олинса, буни Трамп имижи учун навбатдаги пропаганда деб тушунса бўлади. Лекин бу хулоса учун ҳали ҳеч қандай асослар йўқ, фақат тахминлар бор.

Келинг, шу тахминларга тўхталиб ўтамиз.

Аввало, Оқ уй матбуот котиби Кэролайн Левит тадбир аввалидан Fox News’га интервю бераркан, кеча жуда қизиқ кечиши, баъзи ўқлар отилиши, бу эса классик Доналд Трампни эслатишини айтган.

Бундан ташқари, ўқ овозлари эшитилганидан кейин залга югуриб кирган хавфсизлик хизмати ходимлари бақириб бу ҳақида хабар бераркан, юзлаб медиа вакиллари саросимага тушади ва столлар остига беркина бошлайди. Буни бироздан кейин сезган АҚШ биринчи хоними – Мелания Трамп ҳамда Оқ уй матбуот котиби Кэролайн Левит ҳам юзида қўрқув аломатлари билан стол остига яширинишга уринди. Лекин президентнинг ўзи у қадар ҳайратлангани йўқ, дастлаб ҳаттоки томоша қилиб ўтирди.

Отишма бўлаётганини билган АҚШ Федерал тергов бюроси директори Каш Пателнинг реакцияси ҳам ноодатий. Америкадек давлатнинг миллий хавфсизлигини таъминлаш, терроризм ва бошқа хавф-хатарларга қарши сиёсатнинг бошида турган шахснинг президентга ҳужум бўлаётган онда бундай бамайлихотир ўтириши ғалати.

Отишмани уюштирганликда гумонланаётган шахс – 31 ёшли Коул Томас Аллен. Калифорниялик IT соҳаси мутахассиси, унинг синфдошлари Алленнинг босиқ ва ақлли экани, қўлидан қотиллик келишига ишониш қийинлигини айтган.

Бироқ энг катта савол шуки – қандай қилиб қуролланган шахс АҚШ элитаси ва Оқ уйга яқин медиа олами йиғилган зал яқинида пайдо бўлди? Ахир бу Америка президенти, у дунёда энг қаттиқ қўриқланадиган шахслардан бири саналади.

Маълум бўлишича, гумонланувчи шахс ҳам Вашингтон Hilton меҳмонхонасида қолган бўлган ва меҳмонхона бу юқори даражадаги тадбир вақтида ҳам ишлашни давом эттирган.

Буюк Британиянинг АҚШдаги собиқ элчиси ва бундай тадбирларда бир неча бор қатнашган Ким Дарроч BBC’га боғланаркан, мухбирлар билан зиёфатларнинг хавфсизлик томонлама суст эканидан нолиган.

“Ёмон ниятингиз бўлса ва бундай жойга бостириб кирмоқчи бўлсангиз, биттагина хавфсизлик чегараси бор холос. Ундан кейин эса сиз президент ўтирган залда бўласиз”, деган элчи.

Бироқ шанба кунги кейсда 31 ёшли гумонланувчининг бу қадар хом режа билан ҳаракатланиши ҳам эътиборни тортади. Унинг қўлидан ҳеч нима келгани йўқ, биттагина хавфсизлик хизмати ходими енгил яраланган, унга ҳам аллақачон шифохонадан жавоб берилган.

Отишмадан бир неча соат ўтиб, президентнинг режаланмаган матбуот брифингини ўтказиши алоҳида мавзу. У ҳеч нимадан қўрқмагани, хавфсизлик хизмати ходимлари ажойиб ишлагани ва Вашингтондаги бу оқшом жуда ҳаяжонли ўтганини гапирди.

СBS телеканалининг 60 дақиқа кўрсатувига интервю берган Трамп эса нима бўлаётганини кўриш учун хавфсизлик хизматига уни зудлик билан олиб кетишларига рухсат бермай турган.

Яна бир муҳим нуқта шуки, воқеа айнан журналистлар билан кечки йиғинда содир бўлмоқда. Трампдек одам матбуотни ёқтирмаслиги, ҳурмат қилмаслиги ҳаммага маълум. Иккинчи муддатга сайланганидан бери у матбуот вакилларини давомли масхара қилиб келади, саволларига жавоб бермайди ёки гапни олиб қочади. “60 дақиқа” кўрсатувидаги интервюсида ҳам ҳозирги матбуот вакиллари Демократик партия билан бир хил экани, одамлар ақлдан озган дунёда яшаётганини айтган. Трампга кўра, медиада бундай одамлар бўлишига қарамай, Америкада ОАВ либерал қолмоқда.

Трамп отишмадан кейинги матбуот брифингидан ҳам ўзи ва жамоаси, сиёсатини олқишлаш йўлидан фойдаланди. Вашингтон Hilton меҳмонхонаси эса чинданам хавфсиз жой эмаслигини айтиб, Оқ уйдаги ўзи қурдираётган зиёфатлар зали нақадар муҳимлигини айтиб ўтиб кетди. Президентдан кейин сўзга чиққан администрация вакиллари ҳам Трамп Америкада кескин ўзгаришлар қилгани боис ҳам буни кўтара олмаётганлар унга ҳужум қилаётганини айтиб, президентга хушомад қилишди.

Гумонланувчи душанба, 27 апрел куни биринчи судга тортилади. Трампга кўра, яқин 2-3 кун ичида тафсилотлар янада аниқлашади.

Эслатиб ўтамиз, 2024 йил, президент сайлови олдидан Пенсилвания штатида сайловчилар билан мулоқоти чоғида Доналд Трампнинг ҳужумга учраши уни ғалаба томон етаклаган воқеалардан бири эди. Ҳаттоки, Трампдан нафратланадиган баъзи миллиардерлар айнан ўша отишмада унинг ҳаракатлари сабаб Трамп томонга ўтганини айтган. Балки Эрондаги урушнинг муваффақиятсизликка учраб, Америка ичкарисида бизга бу уруш нега керак деган кайфият урчиган бир онда Трамп имижмейкерлари унинг тушиб бораётган авторитетини тиклаш ва жамоатчиликда яна қизиқиш уйғотиш мақсади ортидан буни уюштирган бўлса, ажаб эмас. Лекин бу шунчаки эҳтимоллар назарияси даражасидаги таҳлил.

Айтиш жоизки, отишма уюштирган шахс мақсади Трампни ўлдириш эканини айтмаган, балки унинг амалдорларини нишонга олиш нияти борлигини қўшимча қилган.

Шоҳрух Мажидов
Тайёрлаган Шоҳрух Мажидов
Kun.uz янгиликларини Google News'да кузатинг
+ Обуна бўлиш

Мавзуга оид