Шолц ва Стармер Украинани қўллаб-қувватлашни давом эттиришга ваъда берди

Германия канцлери Олаф Шолц 2 феврал, якшанба куни Лондон яқинидаги Чекерс расмий қароргоҳида Буюк Британия бош вазири Кир Стармер билан учрашди. Британия ҳукумати сайтида музокаралар якунлари бўйича пресс-релиз эълон қилинди.

Стармер: Украинанинг позицияси кучли бўлиши таъминланади

«Украинадаги вазият ҳақида гапирар экан, бош вазир ўзининг яқинда қилган ташрифини эслатди ва тинчликка куч йўли билан эришиш учун яқин ойларда мамлакат энг кучли позицияда бўлишини таъминлаш муҳимлигини яна бир бор таъкидлади. Раҳбарлар Россиянинг тўлиқ Украинага кенг миқёсда бостириб кириши Европа бўйлаб мудофаа ишлаб чиқаришини қуриш ва мувофиқлаштириш муҳимлигини таъкидлаганини қайд этди», — дейилади баёнотда.

Стармернинг қўшимча қилишича, Буюк Британия ҳукумати бу йил Стратегик мудофаа шарҳини нашр этишни режалаштирмоқда. «У Украинада олинган сабоқларни ҳамда бутун Европа бўйлаб давом этаётган тажовузкорлик ва душманлик фаолиятига қарши туриш зарурлигини ўз ичига олади», деди Британия бош вазири.

Шолц: Киевни қўллаб-қувватлаш давом этади

Германия ҳукумати раҳбари «энди европаликлар ва Украинанинг дўстлари сифатида умумий стратегия ишлаб чиқиш вақти келди», деб айтди, дея ёзади AFP. Шолцнинг сўзларига кўра, бу, биринчи навбатда, «Киевни қўллаб-қувватлаш давом эттирилади» деганидир.

AFP таъкидлаганидек, бу сўзлар АҚШ президенти Доналд Трампнинг Вашингтоннинг Украинага кўп миллиард долларлик ёрдам кўрсатгани ҳақидаги танқидлари фонида янграган. Республикачига кўра, бу Европа давлатларининг умумий қўллаб-қувватлаш миқдоридан ошади.