Samsung ўрта бюджетли A56, А36 ва А26 смартфонларини тақдим қилди

Учаласида ҳам оптик стабилизацияга эга 50 мегапикселли камера ва 5000 мА·соат аккумулятор мавжуд.

Фото: Samsung

Samsung компанияси Galaxy А сериясидаги янги смартфонларини тақдим этди: Galaxy A56 5G, Galaxy А36 5G ва Galaxy А26 5G. Уларнинг барчаси Awesome Intelligence илғор сунъий интеллект (СИ) воситалари тўплами билан қўллаб-қувватланади. Қурилмалар, шунингдек, IP67 стандартига мувофиқ сув ва чангдан ҳимояга эга.

Барча моделларда 6,7 дюймли FHD+ Super AMOLED дисплей, 120 Гц янгиланиш тезлиги ва қуёш нурида ёрқинлигини ошириш учун Vision Booster технологияси мавжуд. Galaxy A56 Exynos 1580 чипи билан қувватланади, Galaxy А36 эса Snapdragon 6 Gen 3 чипи билан. А26 модели Exynos 1380 процессорига эга.

Барча моделларда f/1.8 диафрагма, автофокус ва оптик стабилизацияга эга 50 MP асосий камера мавжуд. Қўшимча камералар моделлар орасида фарқланади: Galaxy A56 12 мегапикселли ультра кенг бурчакли ва 5 мегапикселли макрога эга, Galaxy А36 8 мегапикселли ва 5 мегапикселли, Galaxy А26 эса 8 мегапикселли ва 2 мегапикселли. Барча моделлар «ақлли ўчиргич» ва ўз фильтрларини яратиш қобилияти каби СИ воситалари билан таъминланган.

Барча смартфонлар 5000 мА·соат аккумуляторга эга, Galaxy A56 ва А36 эса 45 Вт тезкор зарядлашни қўллаб-қувватлайди. Экранлар тирналишга чидамлилиги учун мустаҳкамланган Corning шишаси билан қопланган. Хавфсизлик нуқтаи назаридан Samsung Knox Vault технологияси қўшимча маълумотларни ҳимоя қилишни таъминлайди.

Samsung янги моделларни One UI ва Android 15 асосида олти йил давомида қўллаб-қувватлашга ваъда бермоқда. Ранг вариантлари орасида кулранг, графит, зайтун, пушти, лаванда, қора, оқ, лайм ва ялпиз мавжуд.

А26 нархи 299 доллардан (≈3,9 млн сўм), А36 учун 399 доллардан (≈5,2 млн сўм) бошланади. A56 нархи 499 доллар (≈6,5 млн сўм) ва ундан юқори бўлади.

Тайёрлаган: Сардор Юсупов

#Samsung #смартфон #Galaxy A