Камбағалликни қисқартириш жамғармасининг вазифалари белгиланди

Камбағалликни қисқартириш давлат мақсадли жамғармаси ташкил этилган, у тўғрисидаги низом ва унинг Васийлик кенгаши таркиби тасдиқланган.

Жамғарманинг асосий мақсади – "Камбағал оилалар реестри"га киритилган шахсларнинг бандлигини таъминлаш ва тадбиркорлик фаолиятига жалб этишга кўмаклашувчи юридик ва жисмоний шахсларга субсидия, грант ва кредитлар тақдим этиш.

2025 йил 1 октябрдан бошлаб Жамғарма маблағлари ҳисобидан фуқароларга нақд пул шаклида бериладиган субсидия, грант ва ссудалар босқичма-босқич ижтимоий карта орқали тақдим этилади.

Камбағалликни қисқартириш давлат мақсадли жамғармаси тўғрисидаги низом қуйидагиларни белгилайди:

• Жамғармани бошқариш тартиби; 
• Жамғарма маблағларини шакллантириш манбалари;
• маблағлардан фойдаланиш йўналишлари;
• Жамғарма маблағларидан мақсадли ва самарали фойдаланилиши устидан назорат.

Жамғарма маблағларини шакллантириш манбалари:

• Давлат бюджетидан ҳар йиллик трансфертлар;
• қонун ҳужжатларида белгиланган тартибда ижтимоий солиқ бўйича даромадлардан ажратмалар;
• халқаро молия ташкилотларининг грантлари, жисмоний ва юридик шахсларнинг ҳомийлик маблағлари, бошқа хорижий донорларнинг ихтиёрий ёрдами;
• жисмоний ва юридик шахсларга берилган кредитлар бўйича олинган суммалар;
• Жамғарманинг тижорат банкларида ва бошқа молиявий воситаларда эркин маблағларини жойлаштиришдан олинган даромадлар;
• қонун билан тақиқланмаган бошқа манбалар.