ChatGPT норвегиялик эркак икки фарзандини ўлдирганини тўқиди

Норвегиялик Арве Ҳалмар Ҳолман тасодифан OpenAI компаниясининг ChatGPT чатботи ўз оиласи ҳақида кўп нарса билишини, бироқ, таржимаи ҳоли ҳақидаги маълумотларни бузиб кўрсатишини аниқлади.

Эркак ChatGPT ўзи ҳақида қандай маълумотларни ошкор қилишини синаб кўрди. Натижалар уни ҳайратда қолдирди.

Қайд қилинишича, ChatGPT Ҳолманнинг «икки фарзандини ўлдирган ва учинчи ўғлини ўлдиришга уринган, 21 йиллик қамоқ жазосини ўтаётган жиноятчи» эканини айтган.

Ёлғон маълумотлар орасида ҳақиқий фактлар ҳам бор эди. Хусусан, чатбот Ҳолман фарзандларининг сони ва жинсини, шунингдек, яшаш манзилини тўғри кўрсатган.

Ҳолман бу ёлғон маълумотларни осонликча тўғрилай олмаган ва шундан сўнг, Noyb рақамли ҳуқуқлар ташкилотига шикоят йўллаган. Аризада айтилишча, OpenAI Европа Иттифоқи умумий регламентига кўра, маълумотларнинг аниқлиги талабларини бузган.

«Мени энг кўп қўрқитадиган нарса – кимдир бу материални ўқиб, уни ҳақиқат деб қабул қилиши эди», деди у.

ChatGPT Ҳолман ҳақидаги ёлғон даъволарни тарқатишни тўхтатди. Аммо Noyb ҳуқуқшунослари OpenAI компаниясидан Ҳолман ҳақидаги туҳматни олиб ташлашни ва нотўғри натижаларни бартараф этиш учун моделни созлашни талаб қилмоқда. Шунингдек, улар келгусида бундай ҳуқуқбузарликларнинг олдини олиш учун маъмурий жарима солишни таклиф қилмоқда.