Россияда йирик немис фармацевтика компаниясининг заводи мусодара қилинди

Путин фармони билан "Нижегородский химико-фармацевтический завод" АЖ вақтинча бошқарувга ўтказилди. У Stada халқаро фармацевтика концерни таркибига киради.

Фото: Bayer

Россияда Германиянинг йирик фармацевтика компанияларидан бирига тегишли завод мусодара қилинди. 4 апрел, жума куни Россия президенти Владимир Путин Люксембургнинг Nidda Lynx S.A R.L компаниясига тегишли Нижний Новгород кимё-фармацевтика заводи («Нижфарм») акцияларининг юз фоизлик қисмини вақтинчалик бошқарувга ўтказиш тўғрисидаги фармонни имзолади.

Nidda Lynx S.A.R.L. Германиянинг Stada Arzneimittel AG компаниясининг ягона акциядори бўлган Nidda Healthcare Holding Gmb таркибига киради.

Nidda Lynx S.A R.L "Нижфарм" акцияларини 2005 йилдан бери уларга эгалик қилган Stada'дан 2023 йил ноябрида сотиб олди. Декабр ойида "Нижфарм"нинг ўзи Stada «Россия компаниясини алоҳида бизнесга айлантиргани» ва бу «ички қайта ташкил этиш» эканлигини тушунтирди. Stada глобал фармацевтика бозоридаги энг муҳим ўйинчилардан бири ҳисобланади.

Россиянинг "Фармирус" МЧЖ компанияси "Нижфарм" акциялари бошқарувчиси этиб тайинланди. Юридик шахсларнинг ягона давлат реестрига кўра, компания Анна Залогинага тегишли бўлиб, «лойиҳа талаблари асосида дори-дармон ва тиббий асбоб-ускуналарни комплекс етказиб беришни амалга оширади».