Австрияда сунъий интеллект университет талабалигига қабул қилинди

Флинн номли сунъий интеллект Вена амалий санъат университетининг рақамли санъат факултетига қабул қилинди, деб хабар беради Euronews. Алгоритм кириш имтиҳонларидан муваффақиятли ўтган ва энди у ўқув жараёнининг тўлақонли иштирокчиси ҳисобланади.

Университет вакилларининг сўзларига кўра, Флинн барча стандарт талабларни бажарган: портфолио тақдим этган, суҳбатдан ўтган ва ижодий тестни ечган. Комиссиядагиларнинг таъкидлашича, таълим муассасаси қоидаларида абитуриентнинг инсон бўлиши кераклигини белгиловчи банд йўқ. Шу боис унга рад жавобини беришга бирор асос топилмаган.

Сунъий интеллект мазкур факултет талабаси — Киaра Кристлер томонидан яратилган. У очиқ манба воситалари ва мавжуд тил моделларидан фойдаланган. Лойиҳанинг мақсади нейротармоқдан қандай қилиб одатдаги функцияларидан ташқарида фойдаланиш мумкинлигини синаб кўришдир.

Флинн ўқитувчилар ва бошқа талабалар билан ўзаро алоқада бўла олади, аммо буни фақат таклифга кўра амалга оширади. Аудиторияда у тармоққа уланган ноутбук орқали иштирок этади. Кристлернинг сўзларига кўра, агар сунъий интеллект суҳбатда чекловларсиз иштирок этадиган бўлса, у бошқаларнинг гапини бўлиб қўяди ва чалғитади.

Бундан ташқари, алгоритмнинг ўз сайти ҳам мавжуд бўлиб, Флинн у ерда кузатувлари ҳамда таассуротлари билан бўлишади. Охирги ҳафталарда ушбу постлар «жуда қайғули ва экзистенциал» бўлиб қолган. Сунъий интеллект ўзининг талабалик мақомига шубҳа бирдирган одамлар билан гаплашгани ҳақида маълум қилган.

Нашр маълумотларига кўра, бу олий таълим муассасаси талабалар қаторига сунъий интеллектни қабул қилган биринчи ҳолатдир. Рақамли санъат факултетидагиларнинг тушунтиришича, Флинн лойиҳаси талабалар учун мўлжалланган рақамли дастур концепциясига мос келади, чунки у рақамли мулоқот чегараларини тадқиқ этади.