Июл ҳавоси турлича бўлади: об-ҳаво прогнози

Июлнинг илк кунлари ўта иссиқ бўлиши, кейин салқин ҳаво оқими кириб келиши кутилмоқда. Ойнинг иккинчи ярмидан ҳаво оқимлари жазирама иссиқликларни минтақага олиб келиши эҳтимоли бор. Kun.uz'да об-ҳаво прогнози билан – иқлимшунос Эркин Абдулаҳатов.

Жорий йилнинг 24 июн куни республиканинг жуда катта қисмида мавсум учун илк энг иссиқ ҳарорат кузатилди. Хусусан, Термизда +43,9 даража иссиқ, Бухоро, Қашқадарё, Навоий вилоятининг кўплаб станцияларида бу куни +43 даражадан юқори ҳарорат рўйхатга олинди. Айнан шу куни Қорақалпоғистоннинг кўплаб станцияларида ҳарорат максимуми +30 даражага ҳам етмади. Мазкур салқин ҳавонинг кириб келаётгани 3-4 кунлигимизнинг об-ҳавосини белгилайди. 26-28 июн кунларида қишлоқ хўжалиги майдонлари жазирама ҳаво ҳовуридан тушганини ҳис этади.

Июл ойининг биринчи ярмида юз берадиган нисбатан салқинлик ойнинг об-ҳавоси меъёрий бўлишини, фақат ва айрим ҳудудларда кўп йиллик меъёрдан 1-2 даража юқори келишини таъминлайди. Буғдойдан бўшаган ер майдонларида иккинчи экинни экишда айрим ҳудуд фермер ва деҳқонлари куз кутилмаларини – октябр ойида экинларни совуқ уриши мумкин бўлган совуқ ҳаво оқимлари шаклланишига мойиллик борлигини эътиборга олиб, экин турларини танлашлари мақсадга мувофиқ бўлади.