Трамп ноқонуний мигрантларга икки соҳада ишлашга рухсат беришни таклиф қилди

«Улар фуқаролик олмайди, лекин ишлаб, солиқ тўлайди», деди у.

Фото: Doug Mills/The New York Times

АҚШ президенти Доналд Трамп айрим ноқонуний мигрантларга қишлоқ хўжалиги ва меҳмонхона бизнесида ишлаш учун мамлакатда қолишига имкон берувчи тизим яратиш масаласини кўриб чиқаётганини айтди.

Унинг сўзларига кўра, ҳужжатсиз мигрантлар шаклидаги арзон ишчи кучидан воз кечиш фермерлар ва меҳмонхона эгалари учун ёмон оқибатларга олиб келади. У бундай ишчиларга қонуний равишда Қўшма Штатларда қолиш ва солиқ тўлаш имкониятини берувчи «вақтинчалик йўлланма» жорий қилишни таклиф этди. Бироқ, бу йўлланма ноқонуний мигрантларга фуқароликни олиш учун имконият бермаслиги керак.

«Фермерлар бу одамлар учун жавобгар бўлиши мумкин. Улар фуқаролик олмайди, лекин ишлаб, солиқ тўлайди», деди у.

Ҳозирча Оқ уй бу қандай ишлашини тушунтирмаган. Ички хавфсизлик департаменти ва АҚШ Фуқаролик ва иммиграция хизмати Трампнинг баёнотига изоҳ беришдан бош тортди.

Трамп президентлик лавозимига киришган пайтида бир миллион ноқонуний мигрантни мамлакатдан депортация қилиш режалари ҳақида айтган эди. Оқ уй раҳбарининг янги таклифи агар амалга ошса, қатъий иммиграция сиёсатининг дастлабки юмшатилишидан дарак беради.