Россия Полшанинг Калининграддаги консуллигини ёпишга қарор қилди

Россия Ташқи ишлар вазирлиги Россиянинг Краковдаги Бош консуллиги ёпилишига жавобан Полшанинг Калининграддаги Бош консуллигини ёпаётганини маълум қилди. Бу ҳақда ТИВ хабар берди.

Полшанинг Калининграддаги дипломатик ваколатхонаси жорий йилнинг 29 августидан бошлаб ёпилади, деб хабар қилди ТИВ. «Ушбу қадам Полша томонининг Россиянинг Полша Республикаси ҳудудидаги консуллик мавжудлигини қисқартиришда ифодаланган асоссиз ва душманона ҳаракатлари билан изоҳланади», — дейилади Россия ТИВ хабарида.

Май ойида Полша ташқи ишлар вазири Радослав Сикорский мамлакат ТИВ Россиянинг Краковдаги бош консуллиги фаолиятига берилган розиликни бекор қилаётганини маълум қилганди. «Россия махсус хизматлари Меривилска кўчасидаги савдо марказига нисбатан жирканч қўпорувчилик ҳаракатини амалга оширганлиги ҳақидаги далиллар туфайли мен Россия Федерациясининг Краковдаги консуллиги фаолиятига розилигимни бекор қилишга қарор қилдим», деб тушунтирди Сикорский.

Гап 2024 йил 12 май куни Варшавадаги Marywilska савдо марказида содир бўлган ёнғин ҳақида кетмоқда. Ўшанда 1400 дўкон ва мижозларга хизмат кўрсатиш шохобчалари бутунлай ёниб кетди. Бир йил ўтиб, Полша воқеага Россия махсус хизматлари томонидан уюштирилган ўт қўйиш сабаб эканлигини эълон қилди.