Renault Франция президенти учун зирҳли Rafale ишлаб чиқарди

Кроссовер Франциянинг Centigon компаниясидан зирҳ олди. Ташқи томондан Франция байроғи рангларидаги декорация ва флагшток билан ажралиб туради.

Фото: Renault

Renault автоконцерни Франция президенти учун махсус ишлаб чиқилган гибрид Rafale модели асосидаги эксклюзив зирҳли кроссоверни тақдим этди. Машина зирҳ билан жиҳозланган ва ички қисми қайта ишланган.

Ташқи томондан президентнинг Renault Rafale автомобили Франция байроғи рангларидаги декорация ва флагшток билан ажралиб туради, кузов эса иссиқликни акс эттирувчи эффектли Bleu Prsidence эксклюзив рангларга бўялган. Таъкидланишича, автомобилнинг бўёқлари қуёшда давлат байроғи рангларида ялтираб туради.

Кроссовер Франциянинг Centigon компаниясидан зирҳ олди, Renault автомобил ҳимояси тафсилотларига ойдинлик киритмади. Тўлиқ бошқарувли шасси ва подвеска зирҳнинг оғирлигини ҳисобга олган ҳолда модернизация қилинди. Машина Michelin шиналари билан жиҳозланган 20 дюймли ғилдиракларга эга. Унга 300 от кучига эга двигател ўрнатилган.

Renault салоннинг орқа қисми ғилдиракли офис сифатида яратилганини таъкидлади. Климат назорати тизимини оптималлаштириш ва йўловчилар учун акустик қулайликларга алоҳида эътибор қаратилди. Ички безакда автомобил саноатида кам учрайдиган Пиреней Noir Grand Antique мармари ишлатилган, шунингдек, панеллар лазер ўйма нақшли қимматбаҳо тери билан қопланган.

Тайёрлаган: Сардор Юсупов

#Франция #Эммануэл Макрон #Renault Rafale