Трамп яна АҚШ «дунёдаги энг қайноқ мамлакат» эканини айтди

Оқ уй раҳбари энди бутун дунё Қўшма Штатларга ҳавас қилаётганини таъкидлади.

Фото: Kevin Lamarque / Reuters

АҚШ бир йил аввал «ўлик мамлакат» эди, энди эса «барчанинг ҳасадига» эришди, деди Америка президенти Доналд Трамп.

«Бир йил олдин Қўшма Штатлар деярли ўлик мамлакат эди. Энди биз дунёнинг исталган бурчагида «қайноқ» мамлакатмиз, ҳамманинг ҳаваси келади», деб ёзди Трамп Truth Social ижтимоий тармоғида.

Аввалроқ Трамп Fox News телеканалига берган интервьюсида россиялик ҳамкасби Владимир Путин билан 15 август куни Аляскада бўлиб ўтган учрашуви ҳақида гапирар экан, АҚШ «замбарак каби қайноқ» эканини айтди, «гарчи бир йил олдин у [Путин] Америка ўлган деб ўйлаган бўлса ҳам».

Трамп 8 август куни ҳам НАТО аъзолари етакчиларининг фикрига таяниб, АҚШ дунёдаги «энг қайноқ» мамлакатга айланганини айтди. Президентнинг таъкидлашича, бундай натижага эришишда унга тариф сиёсати ёрдам берган.

«Улар [тарифлар] бизга фақат пул келтирмади. Бу миллиардлаб, триллионлаб доллар, лекин душман устидан улкан ҳокимият ҳамдир. Биз Покистон ва Ҳиндистон билан бешта урушни якунладик», деди Трамп.

Тайёрлаган: Сардор Юсупов

#АҚШ #Доналд Трамп