Seoul Mun мажмуасида 17 ёшли йигит каналга чўкиб кетди

Бош кийимини олиш учун Бўрижар каналига тушган йигит қайтиб чиқолмаган. Орадан қарийб бир сутка ўтганига қарамай, унинг жасади ҳамон топилмаган.

Фото: Kun.uz

Тошкент шаҳридаги Бўрижар каналининг Seoul Mun мажмуасидан оқиб ўтувчи қисмида 21 август куни кечқурун 17 ёшли йигит чўкиб кетди. У бош кийимини олмоқчи бўлиб сувга тушгани, лекин қайтиб чиқолмагани айтилмоқда.

Kun.uz мухбирининг ўрганишларига кўра, йигит Seoul Mun савдо марказида жойлашган киосклардан бирида официант бўлиб ишлаган. Уни қутқармоқчи бўлиб киоск иш бошқарувчиси ҳам сувга тушган, лекин ҳаракатлари самара бермай, ўзини зўрға сақлаб қолган.

Воқеа соат 22:00 лар атрофида рўй берган. Орадан ярим соат ўтиб бошланган қидирув ишлари 20 соатдирки натижа бермаяпти: йигитнинг жасади ҳамон топилмаган.

Муаллиф: Ўроқбоев Шаҳзод

#Тошкент #Seoul Mun #Бўрижар канали