Аёл аёлнинг рақиби эмас: ўзаро қўллаб-қувватлаш — энг катта куч

Аммо ҳақиқат шундаки — аёллар рақиб ҳисобланмайди. Уларни бир-бирига қарши қўйиш керак эмас. Аксинча, аёл аёлни қўллаб-қувватласа, иккаласи ҳам ютади. Жамият ҳам ривожланади.

Ҳамфикрлик, маслаҳат ва елкадошлик

Бир-бирини тинглаш, тушуниш ва қўллаш — бу ҳам ижтимоий қўллаб-қувватлашнинг бир кўриниши. Масалан, катта ҳаётий тажрибага эга бўлган аёл ёш келин-қизларга маслаҳат бериши, бу нафақат бир шахсга, балки бутун оилага ижобий таъсир кўрсатади.

Бугунги кунда аёллар тадбиркорлик, таълим, тиббиёт, фан ва бошқа соҳаларда юксалиб бормоқда. Бу жараёнда бир-бирини қўллаб-қувватлаётган аёллар сафи ҳам кенгаймоқда. Биргаликда бизнес бошлаётган, ижтимоий лойиҳалар уюштираётган, таълим марказлари очаётган аёллар сони ортиб боряпти.

«Ютқазиш эмас, ютишимиз керак»

Муваффақият — бу югуришда биринчи бўлиш эмас. У — бирга ҳаракат қилиш, бир-бирини англаш, елкадош-ҳамфикр бўлиб ҳаракатланишдир. Айрим таҳлилларга кўра, аёлларнинг ўзаро қўллаб-қувватлови — уларнинг шахсий ўсишига, психологик барқарорлигига ва карьерасини ривожлантиришга катта таъсир кўрсатади. Ўзи каби аёлнинг бир маслаҳати — бошқа бир аёлнинг ҳаётини ўзгартириб юбориши мумкин. Қийин фурсатда айтилган бир қўлловчи сўз — кимнидир депрессиядан, ҳатто ҳалокатдан ҳам сақлаб қолиши мумкин.

Аёллар бир-бирининг рақиби эмас — балки дўсти, маслаҳатчиси, шериги бўлиши мумкин.

Жамиятда шундай муносабат яралса, аёллар нафақат ўзлари, балки фарзандлари ва атрофдагиларнинг ҳам бахти учун ҳаракат қилади.

Шундай экан:

• Қўшни қизнинг ғоясини тингланг.
• Ҳамкасб аёлнинг ютуғини олқишланг.
• Таниган тадбиркор аёлни қўллаб-қувватланг.
• Сизга ҳавас қилган бир қизга илҳом бўлинг.

Чунки аёлнинг аёлга бўлган таянчи — жамиятнинг таянчига айланади.