Мерц Путин ва Зеленский ўртасида Женевада учрашув ўтказишни таклиф қилди

Германия канцлери Фридрих Мерцнинг сўзларига кўра, Украина ва Россия президентлари Володимир Зеленский ва Владимир Путин ўртасидаги тўғридан тўғри музокаралар Женевада бўлиб ўтиши мумкин. 2 сентябр, сешанба куни Берлинда Швейцария президенти Карин Келлер-Зуттер билан ўтказган қўшма матбуот анжуманида Мерц «Женева ўт очишни тўхтатиш бўйича келишувга эришиш учун мос жой бўларди», деди.

Германия ҳукумати раҳбари 4 сентябр куни Парижда гибрид форматда бўлиб ўтадиган Украина бўйича «кўнгиллилар коалицияси» йиғилиши чоғида Швейцариянинг ушбу шаҳрида бундай саммит ўтказиш таклифини билдиришини таъкидлади. Аввалроқ Франция президенти Эммануэл Макрон ҳам Путин ва Зеленский ўртасидаги музокараларни Женевада ўтказиш тарафдори эканини айтганди.

Келлер-Зуттер, ўз навбатида, Швейцария ҳукумати Женевада Зеленский ва Путин ўртасидаги икки томонлама учрашувни ташкил этишга тайёрлигини айтди. Унинг сўзларига кўра, кўплаб халқаро ташкилотларнинг офислари жойлашган шаҳар тинчлик музокаралари учун «идеал». «Бу одамлар ҳеч бўлмаганда олдинга бир қадам қўйилиши ва урушни тўхтатиши учун бир-бири билан гаплашиши жуда муҳим», деб таъкидлади Швейцария президенти. «Лекин, албатта, бу барча томонларнинг музокаралар столига ўтиришга тайёрлигига боғлиқ бўлади», — дейди у.