Путин Фицодан Украинани энергия ресурсларидан маҳрум этишни талаб қилди

Россия президенти Владимир Путин Словакияни Украинага энергетик блокада ўрнатишга чақирди. «Реверс йўналишда кетаётган газ таъминотини ёпинг, электр таъминотини ёпинг — ва улар бошқа одамларнинг манфаатларини бузиш соҳасида уларнинг хатти-ҳаракатларида қандайдир чекловлар борлигини дарҳол англайди», деди Путин 2 сентябр, сешанба куни Пекинда Словакия бош вазири Роберт Фицо билан музокаралар чоғида. У аввалроқ Украинанинг "Дружба" нефт қувурига дрон зарбаларини танқид қилганди.

Хитойга «Иккинчи жаҳон уруши даврида милитаристик Япония устидан қозонилган ғалабанинг» 80 йиллигига бағишланган маросимда иштирок этиш учун келган ягона Европа етакчисига айланган Фицо ҳам Киевнинг ҳаракатларини қоралади ва 5 сентябр куни Володимир Зеленский билан учрашувда нефт қувури хавфсизлиги масаласини кўтаришга ваъда берди.

Учрашувда Путин Фицога Словакиянинг «мустақил ташқи сиёсати» учун миннатдорчилик билдирди, у ўз навбатида Европа Иттифоқини «қудуқ тубида ўтирган ва дунёда нималар бўлаётганини кўрмаётган қурбақа»га қиёслади. «Мен Европа Иттифоқини чуқур ҳурмат қилсам ҳам, у дунёдаги ҳаракатларга жавоб беришга қодир эмас», деди Словакия бош вазири ва унинг мамлакати Россия билан энергетика соҳасида ҳамкорлик қилиш ва Россиядан нефт ва газ олишдан ниҳоятда манфаатдор эканини айтди.