Миндич Зеленский устидан судга шикоят қилди

Украина Кассация маъмурий суди маълумотига кўра, Миндичнинг даъво аризаси иш юритувига қабул қилинган. Ишни кўриб чиқувчи суд ҳайъати 14 май куни шакллантирилган.

Даъвода жавобгар сифатида Украина президенти Володимир Зеленский, Миллий хавфсизлик ва мудофаа кенгаши ҳамда Иқтисодиёт, атроф-муҳит ва қишлоқ хўжалиги вазирлиги кўрсатилган.

Тимур Миндич “Украинская правда” нашрига берган интервьюсида ўзини айбсиз деб ҳисоблашини айтган. “Мени қилмаган ишларимда айблашмоқда”, — деган у.

Тимур Миндич Украинадаги “Энергоатом” давлат энергетика компанияси атрофидаги йирик коррупция можаросининг асосий фигурантларидан бири ҳисобланади.

Украина Миллий антикоррупция бюроси ва Ихтисослаштирилган антикоррупция прокуратураси 2025 йил ноябрь ойида “Энергоатом” атрофидаги коррупцион схемани фош қилганини маълум қилган. Тергов версиясига кўра, компания контрагентларидан шартнома суммасининг 10–15 фоизи миқдорида пора талаб қилинган.

Мазкур иш доирасида бир қатор амалдорлар ва Тимур Миндич тилга олинган. Тергов маълумотларига кўра, бизнесмен энергетика соҳасидаги амалдорларга таъсир ўтказган бўлиши мумкин.

Антикоррупция органлари Миндич ва ўша вақтдаги адлия вазири Герман Галушченко уйида тинтув ўтказган. Бироқ бизнесмен тинтувдан бир неча соат олдин Украинадан чиқиб кетгани айтилмоқда.

Коррупция можаросидан кейин Украина Миллий хавфсизлик ва мудофаа кенгаши Исроил фуқароси бўлган Тимур Миндич ва тадбиркор Александр Цукерманга қарши санкциялар жорий қилишга қарор қилган. Зеленский 13 ноябрь куни бу қарорни фармон билан кучга киритган.

Санкциялар доирасида Миндич давлат мукофотларидан маҳрум қилинган, унинг активлари музлатилган. Шунингдек, унга савдо операцияларини амалга ошириш, апитални хорижга олиб чиқиш, хусусийлаштиришда иштирок этиш, Украина радиочастоталаридан фойдаланиш, давлат ва мудофаа харидларида қатнашиш ҳамда ер участкалари сотиб олиш тақиқланган.