Юпқа iPhone Air – дизайн ғалабаси бўлиши мумкин – таҳлилчилар

Apple бош директори Тим Кук сешанба куни компаниянинг энг юпқа телефони ва саккиз йил ичида энг катта ўзгариш кўринган моделни тақдим этаркан, таҳлилчилар уни биринчи марта чиройли дизайнларни тақдим этган марҳум Стив Жобсга ўхшатишди.

Кук 9 cентябр кунги тақдимотни айнан Жобснинг гапидан иқтибос билан бошлаган: Биз учун дизайн бирор нарсанинг қандай кўриниши ёки уни ҳис қилишдан кўра кўпроқ маънони англатади, деди у.

Apple компанияси рекорд даражада юпқа бўлган iPhone Air смартфонини тақдим этаркан, корпусининг қалинлиги атиги 5,6 мм. Display Promotion технологиясига эга. Ceramic Shield олдинги моделларга қараганда тўрт баравар кучлироқ. Титан рамка 80 фоиз қайта ишланган материаллардан тайёрланган. Смартфон тўрт хил рангда чиқарилади. iPhone Air А19 Pro процессорида ишлайди. Камчиликлардан бири - унда фақат битта камера бўлади: 48 MP аниқлик билан. Фронтал камера ҳам янги - 18 MP. Кўринишидан iPhone 17 билан бир хил.

Таҳлилчилар айнан шу модель энг муваффақиятли чиққанини айтса-да, бироқ мижозлар унинг битта камераси борлигидан ҳамда қувват тизимидан рози бўладими ёки йўқ – бу муҳим омил.

iPhone 17 Air сунъий интеллект вазифалари учун созланган Apple компаниясининг энг яхши ва энг янги А19 Pro процессор чипини ва иккита янги махсус алоқа чипини ўз ичига олган,

“Бу модель эълон қилинган пайтда мен баланд овозда қарсак чалишганини эшитдим”, дейди 24 миллионга яқин обуначиси бўлган техноблогер Гаурав Чаудхари. У Air’нинг титан рамкаси ва “керамика қалқони” ойнасини юқори баҳолади, Apple бу қурилмани янада мустаҳкам қилишга ваъда берган.

Ўн етти йил олдин Жобс компаниянинг биринчи Macbook Air’ини юпқа ҳолатда тақдим қилгани корпоратив қулайликка олиб келганди. iPhone Air эса ана шу компьютернинг телефон вариант бўлиши мумкин.

“Ўйлайманки, бизга кетма-кет бир хиллик тақдим этилган даврда Apple’нинг бозорга янги маҳсулот чиқараётганини кўриш жуда зўр. Бу iPhone’нинг бутун сегментини жонлантиради”, деди PP Foresight таҳлилчиси Паоло Пескаторе.

Бироқ ушбу моделнинг салбий томони фақат битта камерага эгалигида.

Creative strategies технологик консалтинг компаниясининг бош директори Бен Бажариннинг таъкидлашича, ушбу моделнинг батареяси қанчалик мустаҳкамлиги жавоби муҳим бўлади. Apple’нинг махсус чиплари ёрдам бериши керак, чунки компания ўн йилдан ортиқ вақт давомида энергия самарадорлиги ва ўлчамига тинимсиз эътибор қаратган ҳолда ўз чипларини лойиҳалаштирган, дея қўшимча қилади Бажарин.

Айнан iPhone Air Apple компаниясига Хитойдаги мижозларни қайтариб олишга ёрдам бериши мумкин. Чунки бу бозорда нозикроқ, нафис ва арзон бўлган смартфонлар iPhone ўрнини эгаллаб бормоқда.

"Биз iPhone Air сотувни сезиларли даражада оширишини кутмаймиз, чунки Аpple истеъмолчилар учун муҳим бўлган нозик дизайнга эришиш учун батарея қуввати, камералар ва аудио юқори имкониятларидан воз кечди", дейди IDC тадқиқот компаниясининг катта смартфон таҳлилчиси Уилл Вонг.