ФҚБ Чарли Кирк ўлдирилган қуролни топди ва гумонланувчини қидирмоқда

Юта штатида консерватив фаол ва Доналд Трамп тарафдори Чарли Киркнинг ўлдирилишида гумон қилинаётган шахс қидирилмоқда. Turning Point USA асосчиси, 31 ёшли Кирк чоршанба куни Utah Valley университети кампусида нутқ сўзлаётганда ҳалок бўлди.

Пайшанба куни бўлиб ўтган матбуот анжуманида ФҚБ махсус агенти Роберт Болс расмийлар Киркни ўлдириш учун мўлжалланган қурол – «силжувчи затворли милтиқ»ни топишга муваффақ бўлганини маълум қилди.

Болснинг сўзларига кўра, қурол мерган ўзи жойлашган бино томидан сакраб тушиб, яширинган ўрмон ҳудудида топилган. Шунингдек, у қурол таҳлил учун лабораторияга юборилганини қўшимча қилди.

Американинг CBS телекомпанияси манбалари бу 30-06 калибрли Mauser милтиғи эканини маълум қилди.

Шунингдек, криминалистлар гумонланувчининг оёқ кийими, кафти ва билак изларини топган.

Юта жамоат хавфсизлиги департаменти комиссари Бо Мейсоннинг айтишича, расмийлар гумонланувчининг кампус бўйлаб ҳаракатланишини ҳам аниқлашга муваффақ бўлган. Унинг сўзларига кўра, гумонланувчи кампусга маҳаллий вақт билан соат 11:52 да етиб келган. Унинг қўшимча қилишича, унинг жамоаси мерганнинг кампус бўйлаб, зинапоялардан томга ва том орқали «ўқ узиш жойи»га ҳаракатланиш йўналишини кузатган.

Ютада пайшанба куни кечқурун бўлиб ўтган навбатдаги матбуот анжуманида гумондорнинг янги видеоси намойиш этилди. Унда қора кийимдаги одам бино томидан сакраб, кампус ҳудудини тарк этаётганини кўриш мумкин.

Аввалроқ ҳуқуқ-тартибот идоралари Чарли Киркка қарата отилган ягона ва ҳалокатли ўқ, катта эҳтимол билан, дебатлар бўлиб ўтган университет ҳовлиси яққол кўриниб турадиган Losee Center биноси томидан отилганини маълум қилганди.

Томдаги фигура Кирк ўтирган жойдан тахминан 130 метр (142 ярд) узоқликда эди.

Журналистлар саволига жавоб бераркан, Мейсон гумонланувчининг ташқи кўриниши талабаларни эслатиши, бу эса унга «университет муҳитига яхши мослашиш»га ёрдам берганини айтди.

Жумага ўтар кечаси Юта штати жамоат хавфсизлиги департаменти ҳам тергов учун қизиқиш уйғотаётган шахснинг янги суратларини эълон қилди ва жамоатчиликдан ушбу шахсни аниқлашда ёрдам сўради.

Уларда қидирувдаги шахс Америка байроғи фонида учаётган бургут тасвири туширилган футболка, учбурчак шаклидаги эмблемаси бўлган бейсбол кепкаси ва Converse’га ўхшаш кеда кийганини кўриш мумкин.

BBC Verify жамоаси илгари расмийлар томонидан тарқатилган гумондорнинг фотосуратларини интернетдаги мавжуд тасвирларга ўхшашликни қидирувчи юзларни аниқлаш тизими орқали текширди, аммо тасвирлар хиралиги ва у қора кўзойнак тақиб олгани сабабли қидирув натижа бермаган. Шунга қарамай, қора кофтадаги расмни қидириш интернетда шунга ўхшаш тасвирларни чиқариб берган.

ФҚБ Чарли Киркнинг ўлдирилишига алоқадор шахс ёки шахсларни аниқлаш ва ҳибсга олишга ёрдам берадиган маълумот учун 100 минг доллар мукофот эълон қилди.

Юта губернатори Спенсер Кокс ҳуқуқ-тартибот идоралари аллақачон аҳолидан 7 мингдан ортиқ хабар олганини айтди – бу 2013 йилда Бостон марафонидаги портлашдан бери энг катта кўрсаткичдир.

Бу орада бортида Чарли Киркнинг жасади солинган тобут бўлган самолёт Ютадан у яшаган Аризонага етиб келди. Унинг беваси Эрикага самолётда АҚШ вице-президенти Жей Ди Вэнс ҳамда унинг рафиқаси Уша ҳамроҳлик қилган.

Президент Трамп Чарли Киркни вафотидан кейин Озодлик медали билан тақдирлашини эълон қилди, шунингдек, 11 сентябр воқеаларига бағишланган нутқини унинг ўлими ҳақида гапириш билан бошлади.

«Биз уни жуда соғиниб қоламиз. Аммо Чарлининг сон-саноқсиз одамлар, айниқса, ёшлар қалбига жо қилган овози ва жасорати яшашда давом этишига шубҳам йўқ», – деди Доналд Трамп.

Президентнинг 11 сентябр муносабати билан Пентагон биноси яқинида бўлиб ўтиши керак бўлган нутқи жойи кучайтирилган хавфсизлик чоралари туфайли ички ҳовлига кўчирилди.