Киев областидаги темирйўлда ўқ-дориларни ташиш пайтида портлаш содир бўлди

Ўқ-дорилар детонацияси 14 сентябрга ўтар кечаси Киев областида темирйўл орқали ташиш пайтида рўй берган, деб хабар берди Украинанинг «Зеркало недели» нашри манбаларга таяниб. Бу воқеа Фастов районидаги Калиновка қишлоғи ҳудудида содир бўлган.

Украина қуролли кучлари Бош штаби ҳам «Суспiльне»га Киев областида ҳарбий юк олиб кетаётган поездда ўқ-дорилар портлаганини тасдиқлади.

Портлаш натижасида контакт тармоғига зарар етган, бу эса Харкивдан Полшанинг Перемишл шаҳрига кетаётган 73-сонли поезднинг фавқулодда тўхташига олиб келган, деб хабар берди нашр. Поезд йўловчилари яқин атрофдаги ўрмонга эвакуация қилинган. Дастлабки маълумотларга кўра, қурбонлар йўқ, поезд вагонлари ёниб кетмаган.

Украинанинг «Укрзалізниця» темирйўл ташувчиси инфратузилма шикастлангани сабабли Боярка станциясидан ўтаётган 30 га яқин поезд шикастланган ҳудудни айланиб ўтиш учун Мироновка ёки Коростен орқали жўнатилганини маълум қилди. 73-сонли Харкив – Перемишл поезди эрталаб соат тўртларда Киев ва Коростен орқали ўзгартирилган йўналиш бўйича йўлга чиққан, поезд тўрт соатдан кўпроқ ушланиб қолган.

«Фавқулодда вазиятлар бўйича давлат хизмати, темирйўлчилар ва бошқа хизматлар Киев областидаги фавқулодда ҳодиса оқибатларини имкон қадар тезроқ бартараф этиш ва йўловчи поездларга одатий йўналишларни қайтариш учун барча имкониятларни ишга солмоқда», – дейилади «Укрзалізниця» хабарида.

«Укрзалізниця» АЖ бошқаруви раиси Олександр Персовскийнинг айтишича, эвакуация қилинган 240 нафар йўловчининг аксарияти поездда саёҳатни давом эттирган, яна 21 киши автобусда Киевдаги вокзалга олиб кетилган ва у ерда поездга ўтиришган. Йўловчиларнинг бир қисми уйларига қайтишган, компания уларни кейинги поездларда Перемишлга олиб боришга ваъда берган.

Област ҳарбий маъмурияти раҳбари Микола Калашникнинг маълум қилишича, темирйўлдаги «фавқулодда ҳодиса»дан кейин стрессга ўткир реакция туфайли уч аёлга тиббий ёрдам кўрсатилган.

«Зеркало недели» нашри таъкидлашича, ёнида ўқ-дорилар портлаган Калиновка қишлоғи 13 сентябр куни кечқурун бир қатор кучли портлашлар содир бўлган Василков шаҳридан саккиз километр узоқликда жойлашган. Украина телеграм-каналларида пайдо бўлган турли версияларга кўра, портлашлар маҳаллий авиабаза ёки нефт базаси яқинида содир бўлган. Нашрнинг таъкидлашича, қўпорувчилик версияси кўриб чиқилмоқда. Василковдаги портлашлар темирйўлдаги ҳодиса билан боғлиқми ёки йўқми, буниси ҳозирча номаълум.

Киев области ҳарбий маъмурияти тунги соат 13:38 да «област аҳолиси эшитган портлашлар ҳаво ҳужумига алоқадор эмаслиги»ни маълум қилди. Гап Василковдаги портлашлар ёки Калиновкадаги ўқ-дорилар портлаши ҳақида кетяптими, аниқ эмас.

Ички ишлар вазирлиги, Фавқулодда вазиятлар вазирлиги, шунингдек, Украина президенти идораси Киев областидаги воқеага изоҳ бермади.