Ҳамон кредит тўлаётган Байден. Собиқ президент қанча пул топяпти?

АҚШ собиқ президенти Жо Байден президентликдан кетганидан кейин кўринмай қолди. У ҳозиргача бир марта кичик интервю берди, бир-икки марта омма олдида кўринди холос. 82 ёшли Байден асосан даволаниш билан банд. The Wall Street Journal Жо Байден президентликдан кетганидан кейин даромадлари камайиб кетгани, ҳамон уйи учун кредит тўлаб юргани ҳақида мақола эълон қилди. Хўш, ўзи собиқ президентлар қаердан пул топади? Давлат уларнинг харажатларини қоплаб бермайдими? Қуйида шу ҳақда.

{Yii::t(}

Ўтказиб юбориш 6s

Ўтказиб юбориш

Ҳамон кредит тўламоқда

Суриштирувда айтилишича, Жо Байден ва хотини бошқа собиқ президентларга қараганда анча камтарона ҳаёт кечирмоқда. Чунки у Билл Клинтон, Жорж Буш ва Барак Обама каби ўз машҳурлигидан фойдаланмаяпти.

Байден 2018 йил Делавэрдаги Рехебот-Бич шаҳрида баҳоси 2,7 миллион доллар бўлган уйни ипотека кредити эвазига сотиб олади. Маълум бўлишича, Байден уйнинг кредитини ҳамон ёпмаган ва ойма-ой қарзини узишга мажбур. Президент оиласи 2022 йил бу уйни гаровга қўйиб кредит ҳам олган.

Шу ўринда баъзиларда савол пайдо бўлиши мумкин: ахир сайлов компанияси учун президентликка номзодларга миллионлаб доллар пул йиғилади, нега Байден ўша пуллардан уйининг кредитини ёпиб юбормаган? Азизлар, Америкада бу учун қамалиб кетиш ҳеч гап эмас, президентлик кампанияси учун хайрия қилинган пулдан номзод уй учун тўлов қилиш у ёқда турсин, макдоналдс ва қовурилган картошка ҳам буюртма қилолмайди.

Унда АҚШ президенти бўлиб турган пайтида Байденга кредит нимага керак бўлиб қолди, дейишингиз мумкин. Чунки давлат Америка президенти оиласининг шахсий харажатлари, масалан, Байденнинг можароли ўғли Хантерга адвокатга тўлаши учун пул бермайди.

Айтганча, бу номақбул ўғил ҳамон Байденлар оиласи бюджети учун энг катта зараркунанда бўлиб турибди. Нуқул судлашиб юрадиган Хантер доим адвокатга бериш учун отасидан пул сўраб юради. Яқинда айнан пули йўқлиги учун бир ишдан воз кечишга мажбур бўлди. Хантер Байденнинг собиқ хотини унинг устидан судга ариза бериб, 3 миллион доллар алимент пули талаб қилган. Ўғли судда ютқазса, катта эҳтимол бу пулни тўлаш ҳам бечора Жонинг гарданида қолиб кетса керак.

Бундан ташқари, Жо Байден бир йилдан буён саратон билан курашиб келади, яқинда операция ҳам қилинди. Табиийки даволаниш текин эмас, президентлик даври тугаган, давлат фақат қўриқлаш ва баъзи харажатлар учун пул тўлайди холос.

Мағлубият тамғаси

Жо Байден ҳозирда йиллик 416 минг доллар миқдорида нафақа олмоқда. Шундан 250 минг доллари собиқ президент сифатида, қолгани сенатдаги фаолияти учун. Одатда собиқ президентлар хотира мемуарлари ёзиб катта пул ишлашади. Бироқ Байденнинг бу борада ҳам ишлари унча яхши эмас. У мемуар аванси учун 10 миллион доллар олган. Таққослаш учун Барак Обама бундан ўн йил аввал худди шундай шартнома учун 60 миллион доллар олганди.

Собиқ биринчи хоним Жил Байден ўқитувчиликдан кетган. Бу ишда у йилига 100 минг доллар маош олган. Ҳозир эса Милкен институтида аёллар саломатлиги бўйича бир лавозимда ишлаяпти, бу ишда қанча пул топиши аниқ эмас.

Собиқ президентлар одатда турли мавзуларда лекция ўқиб ҳам яхши пул ишлайди. Масалан, Барак Обама буни маромига етказган. Собиқ президентлар битта пулли лекция учун 500 минг долларгача олади. Бироқ Байденни кўп ҳам маъруза ўқишга чақиришмайди. У ҳозиргача бошқарув мавзусида лекция ўқиб 275 минг доллар пул ишлагани маълум.

Байден президентлик маркази қуриш ишлари ҳам секин кетмоқда. Чунки Америка либераллари Байденни демократларнинг сайловдаги мағлубияти учун асосий айбдор деб ҳисоблаяпти. Шу сабаб демократик партия ҳомийлари Байден учун пул тўламоқчи эмас.

Албатта, мақолада 10 миллион доллар, 275 минг доллар, 416 минг доллар каби катта суммалар тилга олинган, лекин собиқ президент оиласи дегани икки чол-у кампирнинг бир квартирада овқат пишириб ўтириши эмас. Бу катта оила ва харажатлари ҳам катта. Президентлик даврида унинг оиласига тадбиркорлик билан шуғулланиш тақиқланади. Ҳамма президентлар ҳам Трамп каби бизнес империяга эга миллиардер эмас. Шу учун уларга президентликдан кейин ҳаётини изига тушириб олиш учун вақт керак. Биз президент Байденга оилавий тотувлик ва кредитини эсон-омон тўлаб олишини тилаймиз.

Ўткир Жалолхонов тайёрлади.
Тасвирчи ва монтаж устаси — Фахриддин Ҳотамов.