Politico: Трамп Гренландия билан алоҳида келишув тайёрламоқда

Бу Лэндрининг мазкур лавозимга тайинланганидан кейин Даниянинг автоном ҳудуди ҳисобланган Гренландияга илк ташрифи ҳисобланади.

Маълум қилинишича, у 19–20 май кунлари инвесторлар, сиёсатчилар ва бизнес вакилларини жалб қилиш мақсадида ташкил этилаётган Future Greenland 2026 иқтисодий форумида иштирок этади.

Sermitsiaq нашри ёзишича, Лэндри билан бирга яна етти нафарга яқин киши келган. АҚШ делегацияси жойлашган меҳмонхонага MAGA (Make America Great Again) шиори туширилган кепкалар солинган қути ҳам олиб келинган.

DR нашри журналисти билан суҳбатда Жеф Лэндри Дональд Трамп унга ташриф олдидан “у ерга бориб, имкони борича кўпроқ дўст орттириш”ни тавсия қилганини айтган.

18 май куни АҚШнинг Даниядаги элчиси Кен Хауэри ҳам Гренландияга етиб келиши кутилмоқда.

АҚШ элчихонаси баёнотида айтилишича, америкалик вакиллар Гренландия аҳолиси билан учрашиб, уларнинг фикрларини эшитиш, иқтисодий имкониятларни кенгайтириш ва икки томонлама муносабатларни мустаҳкамлашни мақсад қилган.

Дональд Трамп Жеф Лэндрини 2025 йил 22 декабр куни Гренландия бўйича махсус вакил этиб тайинлаган эди.

Ўшанда Дания ОАВ АҚШ маъмурияти Гренландия ҳукумати билан Копенҳагенни четлаб ўтиб тўғридан тўғри алоқалар ўрнатишга ҳаракат қилаётгани ва оролда “яширин таъсир операциялари” олиб бораётганини ёзган.

Трамп аввал ҳам АҚШ миллий хавфсизлиги нуқтаи назаридан Гренландия Вашингтон назоратида бўлиши кераклигини бир неча бор таъкидлаган. Унинг фикрича, акс ҳолда орол хавфсизлигига Хитой ёки Россия таҳдид солиши мумкин.

Politico нашри январь ойида Трамп маъмурияти Гренландия билан Дания расмийларини четлаб ўтган ҳолда эркин ассоциация тўғрисидаги келишув лойиҳасини тайёрлаётгани ҳақида хабар берган эди.

Гренландия бош вазири Йенс-Фредерик Нильсен 12 май куни Гренландия, Дания ва АҚШ ўртасидаги музокаралар ҳозирча аниқ келишувларга олиб келмаганини, бироқ маълум даражада силжишга эришилганини билдирган.