Макрон ва Эрдўғанни Ню-Йоркда нега полиция тўхтатди?

Биласизми, бутун бошли Франция президентининг кортежи полиция томонидан тўхтатилиши, унга Америка президенти ҳам ёрдам беролмаслиги мумкин экан. Эммануэл Макрон Америкада шу ҳолатга тушди. Етмаганига полиция Туркия президенти Эрдўғанга ҳам шунақа муомала қилди. Қизиғи, бу икки лидер БМТда Фаластин давлати ташкил этилиши ҳақида гапиргач, шундай «саргузашт»га дуч келди. Қуйида шу ҳақда.

{Yii::t(}

Ўтказиб юбориш 6s

Ўтказиб юбориш

Макрон пиёда кетишга мажбур бўлди

Ню-Йоркда БМТ бош ассамблеясининг навбатдаги сессияси қизиқ воқеаларга бой бўлди. Ўзбекистон учун айниқса самарали кечган сессия меҳмонлари одатда оддий одамлар дуч келадиган ҳолатларга тушиб қолишди. Масалан, Франция президенти Макрон БМТ Бош ассамблеясидан чиқиб мамлакат кунсуллиги томон кетаётганида унинг кортежини полиция тўхтатди.

Макроннинг бу ҳолатдан жаҳли чиқмади, шунчаки ҳайрон қолиб йўлни ёпиб турган ню-йорклик полиция офицери билан гаплашди. Офицер ҳушмуомалалик билан Макронга барча йўллар ёпиқ экани, унинг машинасини ўтказиб юбора олмаслигини тушунтирди. Кейин маълум бўлишича, йўлни Доналд Трамп кортежи учун ёпиб қўйишган экан.

Қараса, америкалик «ГАИ» ҳеч гапга тушунмаяпти, шунда Макрон масалани «ўзбекчасига» ҳал қилишга киришди. Фақат «ГАИ»да ишлайдиган каттароқ таниши ё поччасига эмас, биратўла Америкадаги энг жиддий таниши — Доналд Трампга қўнғироқ қилди. «Биласизми, мистер президент, мен тирбандликда турибман, барча йўл сиз ўтишингиз учун ёпиқ», деди Макрон кулиб Трампга.

Лекин Трамп ҳам Макронга ёрдам беролмади, унинг кортежини ўтказишмади. Кейин Макрон Ню-Йорк кўчалари бўйлаб ярим соат атрофида пиёда кетишга мажбур бўлди. Лекин Франция президенти бу ҳолатдан хафа бўлмади, қайтанга ажойиб самимий фотогалерея қаҳрамонига айланди, одамлар билан расм тушди.

Энди энг қизиғига келдик. Биласизми, Макрон бу саргузаштни бошидан ўтказишидан аввал БМТда нима ҳақида нутқ сўзлаб келди? Франция Фаластин давлатини тан олиши бўйича. Энди тушунгандирсиз гап нимада эканини? Франция Фаластинни тан олиши ҳақида гапиргани Макроннинг «пробка»да қолиб кетишига қанчалик боғлиқ эканини билмадим, лекин Америка Исроилнинг асосий иттифоқчиси ва бу давлат мавжудлигининг бош сабабчиси экани аниқ. Исроил эса Фаластин давлати тузилиши мумкин эмас деб ҳисоблаб, Фаластинни тан олган давлатларга таҳдид қилмоқда.

Безбетликни қаранг, Фаластин давлати ерларини босиб олаётган Исроилга давлат тузиш мумкин экан-у, Фаластин ерларида яшаётган Фаластинга ўз давлатини тузиш мумкин эмаскан. Нимага деб сўрасангиз, «Бу ерларни бизга Худо берган», деган мифларини бошлашади...

Агар Макрон Фаластинни тан олгани унинг кортежи тўхтатилишига боғлиқ эмас десангиз, навбатдаги воқеага эътибор беринг: Ню-Йорк полицияси яна Трампнинг кортежини ўтказиб юбориш учун энди Туркия президенти Ражаб-Тоййиб Эрдўғанни йўлдан ўтказмади. Полиция очиқчасига Эрдўғаннинг йўлини темир тўсиқ билан тўсди. Эрдўған офицерларни четга суриб ўтиб кетмоқчи бўлганида уни ўтказишмади. Орада Эрдўғаннинг қўриқчилари ва маҳаллий полиция зобитлари ёқалашишгача борди. Ўзи Эрдўғаннинг қўриқчилари Ню-Йоркда жанжаллашиши янгилик эмас, бир неча йил аввал Туркия президенти қўриқчилари намойишчилар билан муштлашганди.

Эрдўған Исроилни бир неча марта террор давлат деб атаган, Фаластин давлати тузилишининг бош ташаббускорларидан бири. Энди ўзингиз ўйлаб кўринг, Ню-Йоркка шунча давлат президентлари борган, лекин Фаластинни тан олган Европадаги энг кучли давлат ва НАТОдаги энг кучли давлатлардан бирининг президенти полиция томонидан тўхтатилмоқда. Русчасига айтганда, Совпадение? Не думаю...

Ўткир Жалолхонов тайёрлади.
Монтаж устаси — Фахриддин Ҳотамов