Венгрия Украинанинг 12 та янгиликлар сайтини блоклади

Венгрия ҳукуматининг таъкидлашича, «Украинская правда», Hromadske ва яна 10 та Украина нашрининг блокланиши «Украина цензураси»га жавоб чорасидир.

Фото: hromadske.tv

Венгрия ҳукумати Украинанинг 12 та етакчи янгиликлар порталига мамлакат ичида киришни тўсиб қўйди. Бу чора-тадбирлар Будапештнинг «Украина цензурасига жавобидир», деди Венгрия бош вазири Виктор Орбан идораси раҳбари Гергей Гуйяш 29 сентябр, душанба куни Facebookʼда.

Венгриялик сиёсатчи Киевни Венгриянинг россияпараст интернет-ресурсларини, жумладан, машҳур origo.hu янгиликлар сайтини Европанинг Россияга қарши санкциялари, Украинани ҳарбий қўллаб-қувватлаш ҳақидаги танқидий хабарлари, шунингдек, Европа Иттифоқи ва НАТОнинг гўёки «парчаланиши ва самарасизлиги» туфайли блоклаганликда айблади. Бундан ташқари, Гуйяшнинг сўзларига кўра, Венгрия веб-сайтлари Сорос жамғармасини танқид қилгани учун Украинада блокланган.

«Менимча, кўпчилик «Украинская правда»ни ўқимайди, ҳатто ўқишни ҳам хоҳламайди. Бироқ, суверен давлат мутлақо асоссиз ҳужумга мутаносиб жавоб бериши керак», — деб ёзди Гуйяш «ўзаро муносабатлар тамойили»ни келтириб

Блокланган веб-сайтлар орасида "ТСН - Новини Украiни", Hromadske, "Украинская правда", "Европейская правда", Oboz.ua, Nv.ua, Anons-zak.com.ua, Ungvar.uz.ua, Zakarpattya.net.ua, Lb.ua, Insiderinfo.com.ua ва Uaonline.com.ua бор.

Сентябр ойи ўрталарида Украина ҳукумати бир қанча хорижий веб-сайтларни, жумладан, Венгриянинг Origo ва Demokrata веб-сайтларини Россия ташвиқоти ҳақидаги позицияни мунтазам тарқатишда айблаб, тақиқлаган эди.