FT: Трамп Зеленскийни бутун Донбассни Россияга беришга чақирган

Оқ уйда Володимир Зеленский билан суҳбат чоғида АҚШ президенти Доналд Трамп унга, агар Россияга Донбасс берилмаса, Украинани «йўқ қилишини» айтди, деб ёзади The Financial Times.

Фото: Bonnie Cash/UPI Photo/newscom/picture alliance

17 октябр куни Оқ уйда Украина етакчиси Володимир Зеленский билан бўлиб ўтган учрашувда АҚШ президенти Доналд Трамп уни «Россия шартларини қабул қилишга» чақириб, акс ҳолда Россия президенти Владимир Путин Украинани «йўқ қилиши» ҳақида огоҳлантирган. Бу ҳақда 19 октябр, якшанба куни манбаларга таяниб, Financial Times нашри хабар берди.

Оқ уй раҳбари, хусусан, Украина президентини FT хабарига кўра, Украинанинг учта вилояти — Донецк, Луханск ва Днипропетровскнинг бир қисмини ўз ичига олган бутун Донбасс минтақасини Россияга топширишга чақирди. Бироқ, Зеленский охир-оқибат Трампни ҳозирги фронтда урушни тугатишни қўллаб-қувватлашга ишонтира олди, дея қўшимча қилади газета.

The Washington Post (WP) аввалроқ Путин Зеленский Вашингтонга келишидан бир кун олдин Трамп билан телефон орқали суҳбатда Украинадаги урушни тугатиш шарти сифатида Донецк вилояти устидан тўлиқ назорат ўрнатишни айтгани ҳақида хабар берган эди. Газетанинг манбаларига кўра, бунинг эвазига Россия президенти Запорижжя ва Херсон вилоятларининг бир қисмига бўлган даъволаридан воз кечишга тайёрлигини билдирган.

WP'нинг қайд этишича, Путиннинг ҳозирги ҳудудий талаблари Трамп билан Анкориждаги учрашуви чоғида билдирилганидан бироз камроқ.

Тайёрлаган: Отабек Матназаров

#Донбасс #Доналд Трамп #Володимир Зеленский