АҚШ ва Эрон ўртасида зарбалар алмашинуви бўлиб ўтди

АҚШ Эрон жанубидаги Бандар-Аббос шаҳридаги ҳарбий объектга зарба йўллади. Бу ҳақда Reuters агентлиги америкалик мулозимлардан бирига таяниб хабар берди.

Расмийнинг сўзларига кўра, америкалик ҳарбийлар Ҳўрмуз бўғози ҳудудида Эроннинг тўртта дронини ҳам уриб туширган. Агентлик суҳбатдоши аниқлик киритиб, АҚШ Бандар-Аббосдаги ерости бошқарув пунктини нишонга олганини айтган – бу вақтда у ердан яна бир дрон учиришга тайёргарлик  кўрилаётган эди. 

Манба бу ҳаракатлар «мудофаа мақсадларида ва ўт очишни тўхтатиш режимини сақлашга қаратилгани»ни қўшимча қилган.

Кўп ўтмай Ислом инқилоби муҳофизлари корпуси Америка ҳужумига жавобан Американинг минтақадаги авиабазасига зарба берганини маълум қилди. Корпусдагилар буни АҚШ учун «огоҳлантириш» деб атаб, улар «тажовуз жавобсиз қолмаслиги»ни, агар бу ҳолат такрорланадиган бўлса, Эроннинг жавоби «яна қатъийроқ бўлиши»ни билиши кераклигини таъкидлашган.

Айнан қайси авиабазага ҳужум қилингани ва ҳужум оқибатлари ҳақида расман маълумот берилмаган, лекин худди шу вақтда Кувайт армияси (бу ерда Американинг энг йирик базаларидан бири жойлашган) мамлакат ҳудудига учиб келган дронлар ва ракеталар тўхтатилгани ҳақида хабар қилган.

Эрондаги Tasnim агентлиги ёзишича, Америка зарбасидан олдинроқ Ислом инқилоби муҳофизлари корпуси Американинг Ҳўрмуз бўғози орқали ўтишга уринган нефт танкери томон ўчган, шундан кейин кема ортига қайтиб кетишга мажбур бўлган.

АҚШ ва Эрон ўртасидаги зарбалар алмашинуви икки мамлакат ўртасида ўт очишни тўхтатиш бўйича музокаралар фонида рўй берди. Томонлар Ҳўрмуз бўғозини кемалар қатнови учун очиш масаласида келиша олмаяпти. Эрон бўғозни уруш бошидаёқ ёпиб қўйган, шундан кейин АҚШ ҳам Эрон денгиз портларини қамал қилишга киришган.

27 май куни АҚШ президенти Доналд Трамп Эрон билан музокараларда муҳокама қилинаётган келишув шартларидан мамнун эмаслигини айтди. У Теҳрон урушни якунлаш учун шундай шаклдаги келишув тузишни «жуда қаттиқ хоҳлаётгани»ни таъкидлаган. Шу билан бирга, у агар келишувга эришилмайдиган бўлса, Эрон бўйлаб зарбаларни қайтадан бошлашга тайёрлиги ҳақидаги гапни яна бир бор таъкидлаган.