АҚШ Россияга қарши янги санкцияларни кўриб чиқишни кейинга қолдирди

АҚШ Сенати президент Доналд Трамп россиялик ҳамкасби Владимир Путин билан Будапештда учрашгунча Россияга қарши санкциялар тўғрисидаги янги қонун лойиҳасини кўриб чиқмайди. Бу ҳақда 20 октябр, душанба куни Сенатдаги республикачилар етакчиси Жон Тунга таяниб, Bloomberg хабар берди.

«Айни пайтда биз паузани босмоқдамиз», — дея сенатор сўзларини келтиради агентлик.

Янги қонун лойиҳасига кўра, АҚШ президенти Россиядан энергия сотиб олувчи ва Украинани фаол қўллаб-қувватламайдиган мамлакатлардан импорт қилинадиган товарларга 500 фоизгача бож жорий этиши мумкин. Bloomberg таъкидлашича, Хитой ва Ҳиндистон, жумладан, янги чекловларга дучор бўлиши мумкин.

Ўтган ҳафта Тун АҚШ Сенати қонун лойиҳасини 30 кун ичида овозга қўйиш ниятида эканлигини эълон қилди. 100 сенатордан камида 85 нафари қўллаб-қувватлаганига қарамай, қонун лойиҳаси бир неча ойдан бери мавҳумликда турибди.