Россиянинг Киевга ракета ҳужуми: бир киши ҳалок бўлди, ёнғинлар юз берди

Украина Қуролли кучлари Ҳаво кучлари маълумотига кўра, Россия армияси 22 октябр, чоршанба куни тунги соатларда Киевга яна ракета ҳужуми уюштирди. Ҳужумда қўлланган ракеталар сони ва турлари маълум қилинмаган. Ҳужум оқибатида шаҳарда портлашлар ва ёнғинлар содир бўлгани тасдиқланди. Киев вақти билан соат 6:00 ҳолатига кўра, бир киши ҳалок бўлган.

Киев шаҳар мэри Виталий Кличко Telegram орқали хабар беришича, портлаш оқибатида парчалар шаҳарнинг Днипро туманидаги кўп қаватли уйлардан бирининг ҳовлисига тушган. “Шу туман ҳудудида зарба тўлқини туфайли уй ойналари синди”, — деди у маҳаллий вақт билан соат 3:00 атрофида. Уч соат ўтиб шаҳар мэри маълум қилишича, ҳужум қилинган объектда бир нафар ҳалок бўлган шахснинг жасади топилган ва 10 нафар одам қутқарилган.

Киев шаҳар ҳарбий маъмурияти раҳбари Тимур Ткаченко ҳам хабар беришича, тинч аҳоли ўлими Россия ҳужуми туфайли кўп қаватли уйнинг 8- ва 9-қаватларида юз берган ёнғин оқибатида содир бўлган.

Расмийлар шунингдек Печерск, Голосеевский ва Дарницкий туманларида ҳам портлашлар ва ёнғинлар юз берганини маълум қилди. Кличконинг таъкидлашича: “Голосеевский туманда портлашдан кейин ёнғин юз берди. Печерский туманда парчалар уй ҳовлисига тушди ва автомобилларда ёнғин содир бўлди. Одамлар жароҳат олмади”. Эрталаб эса у Россиянинг янги дронлар ҳужуми ҳақида маълум қилди.

Ткаченко маълумотига кўра, Дарницкий туманда кўп қаватли уй ва нотурар жой биносида ёнғинлар содир бўлди. “Деснянский туманда душман дрони очиқ ҳудудга тушди”, — деди Киев шаҳар ҳарбий маъмурияти раҳбари.