Трамп Будапештдаги Путин билан учрашувни бекор қилганини тасдиқлади

АҚШ президенти Дональд Трамп Россия президенти Владимир Путин билан Будапештда ўтказилиши режалаштирилган учрашув бекор қилинганини тасдиқлади. «Биз президент Путин билан учрашувни бекор қилдик. Менга шунчаки бу нотўғри туюлди. Биз керакли нуқтага етиша олмасдик, деб ўйладим. Шунинг учун мен уни бекор қилдим. Аммо буни келажакда қиламиз», — деди Трамп журналистларга Европа вақти билан пайшанба, 23 октябр кечаси Оқ уйда бўлиб ўтган брифинг давомида.

Россия президенти ўзи бошлаган Украинага қарши урушни тугатишни ҳамон истайди, деб ҳисоблайсизми, деган саволга Трамп ижобий жавоб берди, дея хабар берди CNN телеканали. «Менимча, улар тинчликни исташяпти, менимча, уларнинг иккаласи ҳам (РФ президенти Владимир Путин ва Украина президенти Володимир Зеленский) тинчликни истайди», — деди Трамп ва «бу урушни тугатиш вақти келганини» қўшимча қилди. У, агар ўзи президент бўлганида, «бу уруш ҳеч қачон бошланмас эди», деб таъкидлади.

Шу билан бирга, Трамп Россия билан урушни тўхтатиш бўйича музокаралар суръати секинлигидан учрашувлардан қониқмаслигини тан олди. «Ростини айтсам, ягона айта оладиган гапим шуки: ҳар гал Владимир (Путин) билан гаплашсам, суҳбатларимиз яхши ўтади, аммо кейин улар ҳеч нарсага олиб келмайди», — дея яна таъкидлади Дональд Трамп.

Бир кун аввал, худди шу Овал кабинетда АҚШ президенти Кремл раҳбари билан учрашув ҳақидаги қарор кейинги икки кун ичида қабул қилинишини айтган эди. Ўшанда Трамп журналист саволига жавобан: «Мен бефойда учрашувни хоҳламайман. Вақтни бежизга сарф қилгим келмайди, шундай экан, нима бўлишини кўрамиз», — деган.

16 октябр куни Путин билан телефон орқали суҳбатдан сўнг Трамп келаси ҳафта (20–26 октябр) РФ ва АҚШ делегациялари музокаралари бўлиб ўтишини, АҚШ делегациясига давлат котиби Марко Рубио раҳбарлик қилишини маълум қилган эди. АҚШ президенти шундан кейин у ўзи шахсан Венгрия пойтахтида Россия президенти билан учрашишини эълон қилган. Шу билан бирга, у Украинани узоқ масофали Tomahawk қанотли ракеталари билан таъминлаш тўғрисида қарор қабул қилишни ортга сурган, 23 октябр кечаси эса улардан фойдаланиш бўйича ўқитишга олти ойдан бир йилгача вақт талаб этилишини, аммо АҚШ бундай ўқитишни режалаштирмаётганини айтган.

Шу пайтда АҚШ Молия вазирлиги Россиядаги энг йирик икки нефт компанияси — «Роснефть» ва «Лукойл» — ҳамда уларнинг шуъбаларига Украинадаги урушни тугатиш бўйича «Россиянинг жиддий қизиқиши йўқлиги» муносабати билан қўшимча санкциялар жорий этди.

17 октябр куни Оқ уйда Дональд Трамп ва Володимир Зеленский учрашуви бўлиб ўтди. Ундан бир неча кун ўтиб, AFP агентлиги юқори мартабали украиналик амалдорга таяниб хабар беришича, Трамп Зеленскийга бутун Донбассдан воз кечиш учун босим ўтказган. Манбанинг таъкидлашича, давлат раҳбарларининг музокаралари «таранг» кечган. Кейинроқ Трамп можарони ҳозирги фронт чизиғи бўйлаб «музлатиш»га даъват этганини билдирди.

Ўз навбатида, Россия ташқи ишлар вазири Сергей Лавров 21 октябр куни рус журналистларига Путин ва Трампнинг август ойидаги музокараларидан сўнг Москва позицияси Украина бўйича ўзгармаганини айтди. Лавров ва Рубио ўртасидаги учрашув ҳам бекор қилингани ҳақида Оқ уй вакили журналистларга маълум қилган.

Бундан олдин Financial Times нашри саккиз ғарб ва украин манбасига таяниб хабар беришича, Путин Аляскадаги учрашув пайтида Москвага қарши санкцияларни юмшатиш эвазига урушда оташкесимга рози бўлиш таклифини рад этган, аксинча, Украина шарқида ҳали Россия назоратига ўтмаган ҳудудларни ҳам Москвага топширишни талаб қилган.