«Лукойл»нинг хорижий активлари Gunvor Groupʼга сотилади

«Лукойл» ўзининг хорижий активларини Gunvor Group компаниясига сотиш бўйича дастлабки келишувга эришди. Бу ҳақда компания матбуот хизмати хабар берди.

Қайд этилишича, компания Gunvor’нинг «Lukoil International GmbH»ни сотиб олиш бўйича таклифини қабул қилган ва бошқа потенциал харидорлар билан музокара олиб бормаслик мажбуриятини олган.

Битимнинг амалга ошиши қатор омилларга боғлиқ бўлади. Хусусан, Gunvor томонидан АҚШ Молия вазирлигининг Хорижий активларни назорат қилиш бошқармаси (OFAC) рухсатини олиш талаб этилади. Шунингдек, бошқа хорижий юрисдикцияларда зарур бўладиган лицензия ва рухсатномалар ҳам олиниши керак.

Эҳтимолий савдо битимининг тузилиши «айрим давлатлар томонидан «Лукойл»га нисбатан киритилган чеклов чоралари» билан изоҳланган. Келишувнинг тўлиқ тафсилотлари очиқланмаган.

Gunvor Group 2000 йилда ташкил этилган. Компанияга швед тадбиркори Торбиорн Торнквист ва россиялик бизнесмен Геннадий Тимченко томонидан асос солинган. Тимченко Россия президенти Владимир Путиннинг энг яқин одамларидан бири сифатида кўрилади. 2014 йилда, Россия Қримни аннексия қилиши фонида Тимченко ўз улушини Торнквистга сотади. Бу компанияни санкцияларга тушишдан сақлаб қолиш учун қилинган чора сифатида баҳоланган.

Аввалроқ Америка томони Россиянинг энг йирик икки нефт компанияси — «Роснефт» ва «Лукоил» билан боғлиқ транзакцияларни блоклагани хабар қилинганди. АҚШ санкциялари эълон қилинганидан кўп ўтмай «Лукойл» хориждаги активларини сотиш бўйича салоҳиятли харидорлардан тушган таклифларни кўриб чиқаётганини маълум қилди.