Болгарияда “Лукойл” НҚЗни сотиш: парламент президент ветосини енгиб ўтди

Болгария парламенти 6 ноябр куни президент Румен Радевнинг “Лукойл” активларини сотиш тўғрисидаги қонун лойиҳасига қўйган ветосини енгиб ўтди. Бир кун олдин Радев 24 октябрда қабул қилинган Инвестициялар тўғрисидаги қонундаги ўзгартишларга оид лойиҳани парламентга қайтарган эди, бу ўзгартишлар “Лукойл”га қарашли тўртта компания активларини чеклашни назарда тутади.

Президент ўз ветосини шундай асослади: бундай битимлар учун Давлат миллий хавфсизлик агентлигининг розилиги талаб этилиши ҳукуматни ушбу идора қарорларига боғлаб қўяди, бу эса Болгария конституциясига зид.

Овоз бериш якунига кўра, президент ветосини фақат мухолифатдан 74 депутат қўллаб-қувватлади, қолган 125 депутат уни рад этди.

Шу билан бирга, болгар ҳокимияти қонунчиликка Бургасда “Лукойл”га тегишли НҚЗни давлат назоратига олиш ва янги эгасига сотиш имконини берувчи тузатишлар киритмоқчи. Бу ҳақда 5 ноябр куни Mediapool ва “Капитал” каби маҳаллий ОАВ хабар қилди. Уларнинг таъкидлашича, бундай қадам АҚШ томонидан Россия нефт компаниясига нисбатан жорий этилган санкциялар таъсиридан корхонани ҳимоя қилишни кўзлайди.

ОАВ маълумотларига кўра, Нефт ва нефт маҳсулотлари билан боғлиқ хўжалик фаолиятини маъмурий тартибга солиш тўғрисидаги қонунга тузатишлар лойиҳаси Болгариядаги “Лукойл” активларига махсус бошқарувчи тайинлашни назарда тутади. У активлардан фойдаланишни, жумладан уларни сотишни ҳам амалга ошириши мумкин бўлади, эски эгаси овоз бериш ҳуқуқидан ва ҳатто қарорларни судда шикоят қилиш ҳуқуқидан ҳам маҳрум этилади.

Бургасдаги “Лукойл–Нефтохим” нефт-кимё комбинати — Болгариядаги ягона НҚЗ ва “Лукойл”нинг хориждаги тармоғидаги асосий актив ҳисобланади. Бундан ташқари, Россия компанияси мамлакатда ёнилғи қуйиш станциялари тармоғини ҳам бошқаради. АҚШ президенти Доналд Трамп маъмурияти жорий этган санкциялар унинг Болгариядаги барча активларига тааллуқли.

Октябр ойи охирида “Роснефть” ва “Лукойл”га қарши санкциялар фонида Болгария парламенти келгусида нефт маҳсулотлари танқислигини олдини олиш учун дизел ва авиаёнилғининг экспортини вақтинча тўхтатиш тўғрисида қарор қабул қилди.