ХОҚ трансгендерлар Олимпиадада аёллар билан беллашишини тақиқламоқчи

ХОҚ томонидан ўтказилган тадқиқотда эркак бўлиб туғилган спортчиларнинг жисмоний устунликлари гормон терапиясидан кейин ҳам сақланиб қолиши аниқланди.

Трансгендер спортчи янги зеландиялик оғир атлетикачи Лорел Хаббард

Халқаро олимпия қўмитаси (ХОҚ) трансгендер спортчиларнинг Олимпиададаги аёллар мусобақаларида иштирок этишини тақиқлайди. Бу ҳақда The Times нашри хабар берди.

Манбага кўра, ХОҚ қарорни 2026 йил бошида қабул қилади. Бу вақтга келиб, ташкилот эркакларнинг аёллардан жисмоний устунлиги бўйича илмий тадқиқот натижаларини олиши кутилмоқда.

The Times нашрининг таъкидлашича, ХОҚ тиббий ва илмий директори Жейн Торнтон ўтган ҳафта трансгендерларнинг иштироки туфайли аёллар спорти муаммоларини кўриб чиқишнинг дастлабки натижаларини тақдим этган. Торнтон хонимнинг таҳлили шуни тасдиқлайдики, эркак бўлиб туғилган спортчиларнинг жисмоний устунликлари гормон терапиясидан кейин ҳам сақланиб қолади.

The Times нашрининг ёзишича, ХОҚ янги сиёсати ташкилотнинг Милан ва Кортина-д'Ампеццода бўлиб ўтадиган 2026 йилги қишки ўйинлар вақтида бўлиб ўтадиган сессиясида тақдим этилади. Илгари трансгендер спортчиларга рухсат бериш тўғрисидаги қарор халқаро федерациялар томонидан мустақил қабул қилинган.

Олимпиададаги биринчи трансгендер спортчи янги зеландиялик оғир атлетикачи Лорел Хаббард бўлди. Токио ўйинларида у 87 кг гача вазн тоифасида қатнашиб, сўнгги ўринни эгаллади.