Ўзбекистонда «Online-шифокор» хизмати йўлга қўйилади

Президент Шавкат Мирзиёев 10 ноябр куни Тошкент давлат тиббиёт университетига ташрифи чоғида соғлиқни сақлашни рақамлаштириш доирасида аҳолига масофадан тиббий маслаҳат берувчи «Online-шифокор» сервисини жорий этиш вазифасини белгилади. Ягона рақамли инфратузилма орқали беморлар уйидан чиқмасдан врач билан боғланиб, электрон ҳужжатларни олиши мумкин бўлади.

Фото: Президент матбуот хизмати

Тошкент давлат тиббиёт университетида бўлиб ўтган тақдимотда соғлиқни сақлаш тизимини рақамлаштириш, тиббий хизматлар сифатини ошириш ва тиббий таълимни такомиллаштириш борасидаги ишлар муҳокама қилинди. Шу доирада «Online-шифокор» хизмати ишга туширилиши маълум қилинди.

Янги сервиснинг мақсади аҳолига бирламчи масофавий қабулни қулай форматда тақдим этиш, навбат ва сафарбарликни қисқартириш, тезкор йўлланмалар беришдир. Қуйидаги имкониятлар назарда тутилган:

видеоқабул/аудио/чат орқали врач билан боғланиш;
электрон йўлланма ва таҳлиллар бўйича сўровларни масофавий бериб, натижаларни рақамли олиш;
«Электрон рецепт» тизими билан интеграция асосида дори белгилари ва қайта назоратни юритиш;
ҳолати оғир ёки офлайн кўрик талаб этувчи беморларни туман/вилоят шифохоналарига тезкор йўналтириш.

Президентга тақдим этилган маълумотларга кўра, мамлакат бўйлаб яратилган ягона рақамли инфратузилмада DMED электрон ахборот тизими орқали 36 миллиондан ортиқ фуқаронинг тиббий маълумотлари жамланган. Тез тиббий ёрдам хизматида электрон бошқарув жорий қилиниб, чақириққа етиб бориш вақти 25–30 дақиқадан 10–15 дақиқагача қисқартирилган. «Электрон рецепт» эса ортиқча дори ёзиш ҳолатларини 40 фоизга камайтирган.

Давлат раҳбари «замонавий ускуналар ва сунъий интеллект ечимлари энг қуйи бўғингача етсин, ҳар бир тиббиёт ходими малакасини оширсин» дея таъкидлаб, рақамли хизматларни амалий натижага айлантириш юзасидан мутасаддиларга аниқ вазифалар қўйди.