Қўшимча функционаллар
-
Тунги кўриниш
Мерц Трамп билан Украина учун АҚШнинг «тинчлик режаси»ни муҳокама қилди
Россиянинг Украинага қарши урушини тугатишга қаратилган, АҚШ томонидан таклиф этилган режа юзасидан АҚШ президенти билан телефон орқали суҳбатдан сўнг Фридрих Мерц кейинги қадамлар ҳақида Европа шерикларини хабардор қилади. Бу ҳақда Германия ҳукумати маълум қилди.
Фото: REUTERS
Германия канцлери Фридрих Мерц Россиянинг Украинага қарши урушини тугатиш бўйича АҚШ томонидан таклиф этилган режани муҳокама қилиш учун АҚШ президенти Доналд Трамп билан телефон орқали мулоқот қилди. Бу ҳақда жума куни, 21 ноябрда Германия ҳукуматининг расмий вакили Штефан Корнелиус хабар берди.
Унинг сўзларига кўра, телефон суҳбати «ишончли ва конструктив» руҳда ўтган, томонлар маслаҳатчилар даражасидаги «кейинги қадамлар» юзасидан келишиб олган. Энди Мерц бу ҳақда Европа шерикларини хабардор қилади.
Мерц НАТО бўйича АҚШнинг илк европалик иттифоқчиси сифатида Трамп билан 28 банддан иборат Америка «тинчлик режаси»ни муҳокама қилди, дея таъкидлайди dpa агентлиги. Уларнинг суҳбати тахминан 15 дақиқа давом этган.
Dpa’нинг Германия ҳукуматидаги манбаларига кўра, ҳозир европалик иттифоқчилар ўзларининг «воситачилик ҳужжати» устида ишлаяпти, у ҳали келишув босқичида. «Катта йигирмалик» (G20) саммити доирасида, 22–23 ноябр кунлари Йоханнесбургда кейинги музокаралар бўлиб ўтади. Уларда Мерцдан ташқари Франция президенти Эммануэл Макрон, Буюк Британия бош вазири Кир Стармер ва Италия бош вазири Жоржа Мелони ҳам иштирок этиши кутилмоқда.
