Замонавий меъморлик афсонаси Фрэнк Гери 96 ёшида вафот этди

Келажакда машҳур меъморга айланган Фрэнк Гери 1929 йил 28 февралда Торонто шаҳрида Фрэнк Оуэн Голдберг номи билан туғилган. 1940-йиллар охирида у оиласи билан АҚШга кўчиб ўтади ва антисемитизмдан қочиш учун ўз исмини ўзгартиради.

Гери ўз фаолиятини Лос-Анжелесда бошлаган, 1960-йиллар бошидан эса Парижда ишлаган ва 1962 йилда у ерда ўзининг шахсий меъморлик бюросини очган. 1970–80-йилларда унинг жасур, тажрибага бой лойиҳалари — кўпинча ғижимланган қоғозни эслатадиган металл фасадли бинолари уни деконструктивизм архитектурасида етакчи шахсга айлантирди. У архитектура соҳасидаги деярли барча йирик мукофотларни қўлга киритган.

Гери Жанубий Калифорния университетида архитектура профессори бўлиб ишлаган, шунингдек Йел ва Колумбия университетларида ҳам дарс берган. Гери икки марта уйланган ва тўрт фарзанди бор эди. У кекса ёшигача фаол ишлашда давом этди.

1989 йилда нуфузли Притцкер архитектура мукофотини қўлга киритганидан сўнг, у 1997 йилда Испаниянинг Билбао шаҳрида барпо этилган Гуггенхайм музейи орқали жаҳон миқёсида катта шуҳрат қозонди. Бу иншоотнинг ёрқин ва одатдан ташқари шаклларини яратишда илғор компютер дастурлари қўлланган.

Лос-Анжелесдаги Уолт Дисней концерт зали 274 миллион долларга тушган бўлиб, New York Times газетаси уни 2003 йилда “энг улуғвор бино” деб атаган.

Европада Герининг энг машҳур бинолари қаторига Париждаги Fondation Louis Vuitton, Прагадаги “Рақсга тушаётган уй” ва Берлиндаги DZ Bank биноси киради. Германияда у, шунингдек, Вайл-ам-Райндаги Vitra дизайн музейини, Дюсселдорфдаги Янги божхона майдонини (Neuer Zollhof) ва Ҳанновердаги “Гери минораси”ни лойиҳалаган.

АҚШда эса Гери, бошқа иншоотлар қаторида, Ню-Йоркдаги Beekman Tower осмонўпар биносини ва Калифорниядаги Менло-Паркда Facebook компаниясининг кампусини қурган.