Немисларнинг учдан икки қисмидан кўпроғи Мерц ҳукуматидан норози

Фридрих Мерц бошчилигидаги, Германия Федератив Республикасида ҳукмрон “қора-қизил коалиция” аҳоли орасида қўллаб-қувватлашни янада йўқотмоқда. Бу ҳақда Bild am Sonntag ҳафталик нашри буюртмасига кўра INSA жамоатчилик фикрини ўрганиш институти ўтказган сўров натижалари гувоҳлик бермоқда. Натижалар 6 декабр, шанба куни нашр сайтида эълон қилинган.

Маълумотларга кўра, респондентларнинг 70 фоизи ҳозирги коалиция ишидан норозилигини билдирган. Коалиция таркибига Христиан-демократик иттифоқ (ХДИ), Христиан-социал иттифоқ (ХСИ) ва Германия социал-демократик партияси (ГСДП) киради. Фақат 21 фоиз сўралганлар ҳукумат ишини қониқарли, деб баҳолаган. Бу “катта коалиция” 2025 йил май ойида ҳокимиятга келганидан бери INSA қайд этган энг ёмон кўрсаткичдир. Яна 9 фоиз қатнашчи бу саволга жавоб бермасликни маъқул кўрган.

Канцлернинг фаолиятини бор-йўғи 23 фоиз сўралганлар қўллаб-қувватлаган, бу ҳам илгари кузатилмаган паст даражадир. Респондентларнинг учдан икки қисмидан кўпроғи, аниқроқ айтганда, 68 фоизи унинг ишини салбий баҳолаган, 9 фоизи эса жавоб бермаган. Сўров 4–5 декабр кунлари ўтказилган, унда 1005 киши иштирок этган.

Ушбу тенденция Bild am Sonntag ҳафталик нашри буюртмасига кўра INSA ҳар ҳафта ўтказадиган Sonntagstrend сўровида ҳам ўз аксини топган. Бу сафар тадқиқот саволларига 1–5 декабр кунлари 1206 киши жавоб берган.

Натижаларга кўра, агар Бундестаг сайловлари шу якшанба куни, яъни 7 декабр куни ўтказилганида эди, ҳукмрон учта партия биргаликда парламентда кўпчилик овозга эга бўлолмаган бўлар эди.

Биринчи ўринни 26 фоиз сайловчи овозини қўлга киритиши мумкин бўлган ўнг популистик “Германия учун муқобил” (ГуМ) эгаллаган бўлар эди. Консерватив ХДИ/ХСИ блоги 25 фоиз овоз, ГСДП эса 15 фоиз овоз тўплаган бўларди.