Тошкент метросида тўртта бекатнинг ёпиқ вестибюллари қайта очилади

Йўловчи оқимининг ортиши ва аҳоли талаби инобатга олинган ҳолда, 2025 йил 11 декабрдан бошлаб «Ўзбекистон», «Машинасозлар», «Ғафур Ғулом» ва «Миллий боғ» метро бекатларининг аввал ёпиқ бўлган бир томон кириш (вестибюл) қисмлари йўловчилар учун қайта очилади.

Фото: Тошкент метрополитени

Тошкент метрополитени ахборотига кўра, узоқ йиллар давомида йўловчи оқими камлиги сабаб фаолият юритмаган мазкур вестибюлларда техник янгилаш ишлари амалга оширилиб, барча зарур инженер-технологик жараёнлар якунланган.

Қайд этилишича, бекатлар замонавий техник жиҳозлар билан таъминланган бўлиб, бу йўловчи оқимини равон тақсимлаш, бекатларга кириш-чиқишдаги тирбандликларни камайтиришга хизмат қилади.

Метрополитен маъмурияти Тошкент шаҳри аҳолиси ва меҳмонлари учун қулай ва хавфсиз транспорт хизматларини кўрсатиш бўйича ишлар изчил давом эттирилишини маълум қилган.