Макрон Европани Путин билан мулоқотни қайта тиклашга чақирди

Франция президенти Эммануэл Макрон Европага Россия президенти Владимир Путин билан тўғридан тўғри мулоқотни қайта йўлга қўйиш йўлини топиш зарурлигини билдирди. Франция раҳбари бу баёнотни жума куни, 19 декабр куни Брюсселда берди. Макроннинг сўзларига кўра, Москва билан музокаралар учун мақбул формат излаш Европа давлатларининг манфаатларига мос келади.

“Ё узоқ муддатли тинчлик ҳозирги музокаралар доирасида таъминланади, ёки биз европаликлар Россия билан мулоқотни қайта тиклаш йўлларини топамиз — очиқ тарзда ва Украина билан ҳамкорликда”, — деди Макрон.

Франция президенти Путин билан телефон орқали алоқани сақлаб қолаётган Европа етакчиларидан бири бўлиб қолмоқда. Бундай сўнгги суҳбат июл ойида бўлиб ўтган.

Макрон “Владимир Путин билан яна гаплашиш фойдали бўлади”, деб таъкидлади. Акс ҳолда, унинг айтишича, Европа етакчилари бир-бири билан, шунингдек АҚШ вакиллари билан музокаралар олиб боришга мажбур бўлади, АҚШ эса кейин вазиятни Москва билан мустақил муҳокама қилади. Франция президенти фикрича, бундай сценарий “идеал эмас”.

Франция президентининг баёнотлари ЕИ етакчиларининг тахминан 16 соат давом этган узоқ музокаралари якунланганидан бир неча соат ўтгач айтилди. Саммитда Россия Марказий банкининг тахминан 200 млрд евро миқдоридаги музлатилган захиралари тақдири муҳокама қилинган. Бироқ уларни мусодара қилиш бўйича келишувга эришилмади.

ЕИ саммити якунларига кўра, Украинага қарз олиш ҳисобига ва Россиянинг суверен активларидан фойдаланмасдан, 90 млрд евро миқдорида фоизсиз “репарацион кредит” ажратишга қарор қилинди.

Германия канцлери Фридрих Мерц маълум қилишича, Украина ушбу кредитни фақат Россия репарация тўлаган тақдирдагина қайтариши керак бўлади. Шу билан бирга, канцлер сўзларига кўра, агар Россия томонидан репарациялар тўланмаса, Евроиттифоқ ЕИда блокланган Россия активларидан кредитни қоплаш учун фойдаланиш ҳуқуқини ўзида сақлаб қолади.