Хоразмда тадбиркор ундан иш сўраб келган талаба қизга шилқимлик қилди

Хоразмда талаба қизга шилқимлик қилган тадбиркор маъмурий жазога тортилди. Kun.uz суд ҳужжати билан танишди.

Суд қарорида келтирилишича, 1993 йилда туғилган Ф.У. ҳудуддаги МЧЖлардан бирига раҳбарлик қилиб келган. 2025 йил 13 декабр куни вилоятдаги университетлардан бирининг талабаси бўлган Г.К. унга иш сўраб мурожаат қилган. Тадбиркор қизни суҳбатга чақирган.

Суҳбатдан сўнг Ф.У. талабага шу кундан иш бошлайверишини айтган. Унинг гапига ишонган Г.К. МЧЖда иш бошлаган. Орадан 2-3 кун ўтиб, тадбиркор қизни кечки овқатга таклиф этган. Сўнгра унга чарчаганини айтиб, квартирага боришни ва массаж қилиб қўйишни сўраган. Талаба қиз тадбиркорнинг таклифини рад этиб, кетиб қолган.

Шундан кейин Ф.У. кечки пайт Telegram орқали қизга шаҳвоний хабарлар юборган. Г.К. ҳолат юзасидан ИИБга ариза билан мурожаат қилган.

Ҳуқуқбузар тадбиркор судда айбига иқрорлик билдирган ва қилмишидан пушаймонлигини айтиб, енгиллик сўраган.

Г.К. эса ўқишдан бўш вақтида қўшимча даромад топиш учун ишламоқчи бўлганини билдирган.

“Талабалар турар жойида яшайман. Olx платформасидан иш қидирдим. “Q.” МЧЖ қизларни ишга таклиф қилганини билиб, кўрсатилган телефон рақамига қўнғироқ қилдим. Ўзини Ф. деб таништирган шахс билан гаплашдим. Кейин МЧЖ биносига бориб, Ф. билан учрашдим ва ўша куни иш бошладим. Орадан бир ҳафта ўтганидан кейин Ф. “сен менга ёқиб қолдинг, мен билан квартирага бор”, деб айтди. Мен унга ҳалол ишлаб пул топмоқчи эканимни билдириб, бундай гапларни айтмасликни сўрадим. Лекин Ф. Telegram орқали ҳар хил шаҳвоний мазмундаги хабарлар ҳамда уятсиз стикерлар юбориб, шилқимлик қилди”, деган у судда.

ЖИБ Урганч туман суди қарори билан Ф.У. Маъмурий жавобгарлик тўғрисидаги кодекснинг 41−1-моддаси 1-қисмида назарда тутилган (шаҳвоний шилқимлик) ҳуқуқбузарликни содир этган деб топилди. Унга 5 сутка маъмурий қамоқ жазоси тайинланди.

Аввалроқ Тошкентда ижарачи аёлга шилқимлик қилган уй эгаси 5 суткага қамалганди.