АҚШда Иммиграция хизмати офицери 37 ёшли аёлни отиб ўлдирди

7 январь, чоршанба куни АҚШнинг Миннеаполис шаҳрида ўз машинасида бўлган аёлни иммиграция агенти отиб ўлдирди. Сўнгги кунларда шаҳарда АҚШнинг Иммиграция ва божхона назорати хизмати (ICE) назоратни кучайтирганди.

Ижтимоий тармоқларда тарқалган ва Reuters томонидан тасдиқланган видеода кроссовер йўлни қисман тўсиб тургани кўринади. Дастлаб ушбу машина ҳайдовчиси олдинга силжиган ва бошқа машинани ўтказиб юбориш учун тўхтайди.

Шундан кейин ҳайдовчи ойнани тушириб, яқинлашаётган бошқа пикапга ҳам ўтиб кетишни ишора қилади. Аммо пикап тўхтайди ва ундан ICE офицерлари тушиб, автомобилга пиёда яқинлашади.

🇺🇸⚔️🇺🇸 Trump lied. She died.

WATCH THE VIDEO IN ITS ENTIRETY.

Donald Trump's social media post concerning the fatal shooting of a US citizen in Minneapolis is full of blatant lies.

Trump claims the victim "willfully, and viciously ran over the ICE officer." It is clear in… pic.twitter.com/iZRQETW881

— dana (@dana916) January 7, 2026

Офицерлардан бири ҳайдовчига тушишни буюрган ва эшик тутқичига ёпишган пайтда машина ортга тисарилган. Учинчи агент эса унинг йўлини тўсиш учун машинанинг олдига ўтади.

Шундан сўнг ҳайдовчи ўнгга бурилиб, агентлардан қочиб кетишга уринаётгандек олдинга юради. Машина олдида турган агент эса қуролини чиқариб, орқага чекинади ва ҳайдовчига қарата 3 марта ўқ узган.

Видеода автомобилнинг олд бампери унинг оёғига яқинлашгани кўринади. Машина ICE офицерига тегдими-йўқми, аниқ эмас, бироқ офицер бутун воқеа давомида йиқилмади ва машина ўтиб кетганидан кейин ҳам ўқ узди.

Ўқлардан кейин машина тезлашиб, тўхтаб турган бошқа машиналар ва устунга урилиб тўхтади. Рулда бўлган 37 ёшли аёл Никол Гуд ҳалок бўлди. Офицер эса шифохонада кўрикдан ўтказилиб, чиқариб юборилган.

Шаҳарда норозиликлар бошланди

Миннесота шаҳар кенгаши ҳалок бўлган аёлнинг Рене Никол Гуд эканини айтди. «У эрталаб қўшниларига ёрдам бериб юрган эди ва бугун унинг ҳаёти федерал ҳукумат қўлида якунланди», деб баёнот берди. Кенгаш ICE шаҳардан дарҳол чиқиб кетишини ҳам талаб қилди.

Дрон тасвирларига кўра, шаҳарнинг марказий мавзесидаги отишма бўлган жойга минглаб одамлар тўпланган. Айрим жойларда намойишчилар оғир қуролланган федерал агентлар билан тўқнашган.

Reutersʼнинг ёзишича, Трампга мухолифлар бир нечта шаҳарларда норозилик намойишларига чақирди. Бу ўлим – федерал кучларнинг демократлар бошқараётган шаҳарларга юборилиши фонида миллий кескинлик нуқтасига айланиши мумкинлигини кўрсатмоқда.

«Ўзини ҳимоя қилишми ёки провокация?»

Миннеаполис мэри Жейкоб Фрей Трамп маъмуриятининг агент ўзини ҳимоя қилиш учун ўқ узган деган баёнотини қатъиян рад этди.

«Улар буни аллақачон ўзини ҳимоя қилиш ҳаракати сифатида кўрсатишга уринмоқда. Мен видеони ўзим кўрдим ва ҳаммага бевосита айтмоқчиман — бу бемаъни гап», деди очиқчасига ғазабланган Фрей матбуот анжуманида.

ICE, get the fuck out of Minneapolis. pic.twitter.com/1gfFC0Le6Q

— Mayor Jacob Frey (@MayorFrey) January 7, 2026

Фрей федерал иммиграция агентларини шаҳарда тартибсизлик чиқаришда айблаб, ICE’га қарата: «Миннеаполисдан йўқолинглар», деди. Шу билан бирга, у аҳолини хотиржамликка чақирди. Миннесота, Вашингтон ва бошқа жойлардаги демократ раҳбарлар ICE операциясини кераксиз провокация ва фожиа билан якунланган ҳаракат деб атамоқда.

АҚШ президенти Доналд Трамп аёл «ICE офицерини зўравонлик билан босиб ўтди ва бу «ўзини ҳимоя қилиш учун» ўқ узганини кўрсатади», деб ёзди.

АҚШ Ички хавфсизлик вазири Кристи Ноэмга кўра, Гуд агентларни кун бўйи кузатган, уларнинг машинасини тўсиб қўйган ва йўлдан чекиниш ҳақидаги буйруқларга бўйсунмаган.

«Кейин у машинасини қуролга айлантирди ва ҳуқуқ-тартибот ходимини босиб кетишга уринди», деди Ноэм ва машина офицерга урилганини айтди. Ноэм офицер тажрибали эканини ва «ўргатилганига амал қилганини» айтди.

Шунингдек, у буни ички терроризм сифатида баҳолади ва ҳодиса ФҚБ томонидан тергов қилинаётганини билдирди. Штат расмийлари ҳам алоҳида текширув бошлаган.

Полиция бошлиғига кўра, ҳалок бўлган аёл иммиграция операцияларининг нишони бўлмаган: Гуд шу ҳудудда истиқомат қилган.

АҚШ Ички хавфсизлик вазирлигининг маълум қилишича, Миннесотада 2 000 офицер жалб қилинган «тарихдаги энг йирик операция» ўтказилмоқда. Унда «фирибгарлар, қотиллар, зўравонлар ва жиноий тўдаларни» қўлга олиш мақсад қилинганини билдирди.