“Веймар учбурчаги” Парижда Киевни қўллаб-қувватлаш масаласини муҳокама қилди

Парижда Украина учун хавфсизлик кафолатлари масаласи бўйича “кўнгиллилар коалицияси” учрашуви бўлиб ўтганидан бир кун ўтиб, айни шу мавзу Франция пойтахтидаги “Веймар учбурчаги” музокараларининг кун тартибига ҳам киритилди. Германия ташқи ишлар вазири Йоханн Вадефул 7 январ, чоршанба куни Парижда француз ва поляк ҳамкасблари — Жан-Ноэл Барро ва Радослав Сикорский билан учрашди.

Россиянинг Украинага кенг кўламли ҳужуми бошланганидан кейин “Веймар учбурчаги” форматида ҳамкорликни фаоллаштирган уч давлат ташқи ишлар вазирлари урушни ўз шартлари асосида якунлашни талаб қилаётган Киевга кейинги қўллаб-қувватлаш масалаларини муҳокама қилмоқда. Бундан ташқари, “Веймар учбурчаги” вакиллари Ҳиндистон ташқи ишлар вазири Субраманям Жайшанкар билан ҳам музокара ўтказади.

Бу орада Украина президенти Володимир Зеленский Европа шерикларининг аниқ мажбуриятлари йўқлигидан кўнгли қолганини билдирди. “Менга оддий жавоб керак: ҳа, агар яна бир ҳужум бўлса, барча шериклар Россияга кучли жавоб беради”, — деди Зеленский 7 январ куни. Унинг айтишича, ҳозиргача у бу саволга “аниқ” жавоб олмаган.

Парижда 6 январ куни бўлиб ўтган учрашувда “кўнгиллилар коалицияси”га кирувчи давлатлар Украина учун хавфсизлик кафолатлари ҳақида декларацияни имзолади. Франция президенти Эммануэл Макрон шундай деди: “Бугун биз сезиларли илгарилашга эришдик, бу Париж декларациясида акс этган — у барқарор тинчлик учун ишончли кафолатларни тақдим этади. Ушбу ‘кўнгиллилар коалицияси’ баёнотида илк бор бирлашмага кирувчи 35 давлат, шунингдек Украина ва АҚШ ўртасида тезкор яқинлашув тан олинади. Биз ишончли хавфсизлик кафолатлари ҳақида гапиряпмиз”.

У келишилган бандларни алоҳида-алоҳида санаб ўтди. Улар орасида — АҚШ раҳбарлигида ўт очишни тўхтатишни мониторинг қилиш, Украинани мудофаа учун узоқ муддатли қурол-яроғ билан таъминлаш, шунингдек келажакда Россия томонидан қайта ҳужум бўлса, Украинани қўллаб-қувватлаш бўйича мажбурий кучга эга келишувларни қабул қилиш устида ишлаш каби масалалар бор.

Бундан ташқари, Киев, Париж ва Лондон ниятлар декларациясини ҳам имзолади. Буюк Британия бош вазири Кир Стармернинг сўзларига кўра, бу ҳужжат ўт очиш тўхтатилгандан кейин Украинада британ, француз ва бошқа “шерик” қўшинларни жойлаштириш учун “ҳуқуқий асос” яратади. “Бу Украинага узоқ муддатли истиқболда кўмак бериш бўйича қатъий мажбуриятимизнинг энг муҳим қисми”, — дея Стармер сўзларини келтиради унинг офиси. Бош вазир, шунингдек, ўт очишни тўхтатиш режими бошланиши билан Буюк Британия ва Франция бутун Украина бўйлаб “ҳарбий марказлар” ташкил этишини ҳамда “қурол ва ҳарбий техника сақлаш учун ҳимояланган объектлар қуриш”ини айтди.