NYT: Киев Донбасс бўйича ғайриоддий таклиф билан чиққан

Россия босиб олишга уринаётган Донбасснинг бир қисмини “Донниленд” деб аташ таклифини билдириш орқали Украина музокарачилари Дональд Трампнинг манманлигига таъсир ўтказиш ва уни ўз томонига оғдиришга уринган. Бу ҳақда The New York Times газетаси ёзди.

Фото: Hanna Sokolova-Stekh/DW

АҚШ амалдорлари билан музокаралар чоғида Украина вакиллари Россия ҳали ҳам ҳарбий йўл билан эгаллашга уринаётган Донбасснинг бир қисмини “Донниленд” деб аташни таклиф қилган. The New York Timesʼнинг 21 апрель, сешанба куни ёзишича, бундан мақсад АҚШ президенти Дональд Трампни ўз томонига оғдириш бўлган. Газета бу маълумотни музокаралар жараёнидан хабардор тўрт нафар манбага таяниб келтирган.

“Донниленд” атамаси Донбасс ва Дональд Трамп исмларига ишора қилади, шу билан бирга “Диснейленд” сўзига ҳамоҳанг эшитилади. NYT қайд этишича, узунлиги тахминан 80 километр ва кенглиги 60 километр бўлган, аҳолиси камайиб кетган ва вайрон бўлган украин саноат ҳудудига бундай ном бериш ғалати туюлиши мумкин. Аммо бу, газетанинг ёзишича, ҳукуматлар Вашингтон қўллаб-қувватловини олиш учун Трампнинг шахсий ҳиссиётига мурожаат қилаётган глобал воқеликни акс эттиради.

Газета суҳбатдошларидан уч нафарининг айтишича, “Донниленд” номи илк бор украиналик музокарачилардан бири томонидан қисман ҳазил тариқасида тилга олинган. Бу билан у АҚШ маъмуриятини Россиянинг ҳудудий даъволарига қарши қатъийроқ позиция эгаллашга кўндиришга уринган. Украина томонининг бу саъй-ҳаракатлари ҳозирча самара бермаган, аммо “Донниленд” атамаси шундан бери музокараларда ишлатиб келинмоқда, гарчи у расмий ҳужжатларда учрамаса ҳам.

NYT маълумотига кўра, украиналик музокарачилар “Донниленд” ҳеч бир томоннинг тўлиқ назорати остида бўлмаслиги ва бу ҳолат Трампнинг ютуғи сифатида тақдим этилишини таклиф қилмоқда. Бу ҳудуд Украинадаги урушни тугатиш бўйича музокаралардаги асосий баҳсли нуқталардан бири бўлиб қолмоқда. Россия ҳукумати ушбу ҳудудларда демилитаризация қилинган зона тузишга розилигини билдирган, бироқ бу зона россияликлар патрули назоратида бўлиши шартини қўйган. Киев эса АҚШ Москвадан бу шартларни юмшатишга эришишини кутмоқда.

NYT манбаларига кўра, украиналиклар ҳатто сунъий интеллект ёрдамида “Донниленд” учун байроқ ва мадҳия ҳам яратган. Бу ҳудуднинг катта қисми Россия зарбалари натижасида вайрон бўлган. Бу рамзлар Америка томонига тақдим этилган-такдим этилмагани номаълум. Газета ёзишича, февраль охирида ҳудудий келишмовчиликлар сабаб музокаралар боши берк кўчага кириб қолган, кейин эса АҚШ ва Исроилнинг Эронга қарши уруши Америка делегациясининг эътиборини бошқа томонга бурган.