Гренландия ёки НАТО? Трамп “танлов бўлиши мумкин”лигини айтди

АҚШ президенти Доналд Трампнинг айтишича, унинг президентлик ваколатларини халқаро ҳуқуқ эмас, фақат “ўз ахлоқи” чеклайди. Оқ уй раҳбари The New York Times газетасига берган интервюсида: “Битта чеклов бор. Бу — менинг ўз ахлоқим. Ўз ақл-идроким. Мени тўхтата оладиган ягона нарса шу. Менга халқаро ҳуқуқ керак эмас. Мен одамларга зиён етказишга интилмайман”, — деди.

Журналистлар “Маъмуриятингиз халқаро ҳуқуққа риоя қилиши керакми?” деган савол берганида, Трамп: “Ҳа”, деб жавоб берди. Кейинроқ эса, бундай чекловлар АҚШга қачон татбиқ этилишини “ўзи мустақил ҳал қилиши”ни қўшимча қилди. “Бу халқаро ҳуқуқни қандай таърифлашингизга боғлиқ”, — деди республикачӣ.

Нашр қайд этишича, Доналд Трамп “у учун қай бири муҳимроқ — АҚШнинг Гренландия устидан назорат ўрнатиши ёки НАТОни сақлаб қолишми?” деган саволга тўғридан тўғри жавоб беришдан бош тортган, бироқ “танлов бўлиши мумкин”лигини тан олган.

Мақолада айтилишича, Оқ уй раҳбари алянс АҚШ унда асосий таянч бўлмаса, амалда фойдасиз эканини очиқ-ойдин билдирган. “Менимча, биз ҳар доим Европа билан тил топишамиз, лекин мен уларнинг ақлга келиши(ни) истайман. НАТОга кўпроқ маблағ сарфлашга, ЯИМни оширишга айнан мен мажбур қилганман”, — деди Трамп.

Республикачи журналистлар билан суҳбатда АҚШнинг Каракасда Николас Мадурони қўлга олиш бўйича ҳарбий операцияси Хитой учун Тайван бўйича даъволари доирасида прецедент бўлди, деган фикрни ҳам рад этди.

“Бу (Хитой Халқ Республикаси раиси) Си Жинпингнинг ўзига боғлиқ — у нима қилишини. Лекин мен унга айтганман: агар у шунга ўхшаш иш қилса, мен жуда норози бўламан. Ва мен у бундай қилмайди, деб ўйлайман. Умид қиламан, у бундай қилмайди”, — дея таъкидлади Трамп.