АҚШ президенти Доналд Трамп Truth Social ижтимоий тармоғида Рим папаси Лев XIVни танқид қилиб, уни «жиноятчиликка қарши кураш масаласида бўшанг» ва «ташқи сиёсатда аянчли» деб атаган.
«Мен Эрон ядро қуролига эга бўлишини нормал деб ҳисоблайдиган Рим папасини хоҳламайман. Мен Американинг АҚШга улкан миқдорда гиёҳвандлик моддалари юборадиган Венесуэлага ҳужум қилишини қоралайдиган Рим папасини хоҳламайман. <…> Ва мен АҚШ президентини ўз ишини қилаётгани учун танқид қиладиган Рим папасини хоҳламайман», – деган Трамп.
Унинг фикрича, Лев XIV «фақатгина америкалик бўлгани» ва католик черков буни «президент Доналд Трамп билан мулоқот ўрнатишнинг энг яхши йўли» деб билгани учунгина Рим папаси этиб сайланган.
«Агар мен Оқ уйда бўлмаганимда, Лев ҳам Ватиканда бўлмасди», – дея ёзган Трамп ва Рим папаси «соғлом ақлга таяниши, радикал сўлларга хушомад қилишни тўхтатиши ҳамда эътиборини Сиёсатчи эмас, Буюк Папа бўлишга қаратиши» лозимлигини қўшимча қилган.
2026 йил январида Рим папаси Лев XIV Ватикандаги дипломатик корпусга анъанавий мурожаат билан чиққан, унда, хусусан, «мулоқотни рағбатлантирадиган ва барча томонлар ўртасида консенсусга эришишга интиладиган дипломатияни кучга асосланган дипломатия сиқиб чиқараётгани»ни таъкидлаганди. Шунингдек, у қочқинлар, муҳожирлар ва маҳбусларнинг ҳуқуқлари ва ажралмас инсоний қадр-қимматини ҳурмат қилишга чақирганди.
Кўп ўтмай, АҚШ Мудофаа вазирининг сиёсий масалалар бўйича ўринбосари Элбриж Колби АҚШдаги папа нунцияси (элчиси) кардинал Кристоф Перни Пентагонга таклиф қилади. ОАВ маълумотига кўра, у ва вазирликнинг бошқа амалдорлари кардиналга «ваъз ўқиган», Рим папасининг Трамп сиёсатига қарши ҳар бир ҳужумига норозилик билдирилган.
Рим папаси Яқин Шарқдаги уруш ҳақида шундай деган: «Мен барча манфаатдор мамлакатларнинг фуқароларини ҳокимият вакиллари, сиёсий етакчилар ва конгрессменлар билан боғланиб, уларга тинчлик йўлида ишлаш ва урушни доим рад этишни айтишга чақирган бўлардим».
Папанинг жавоби ва Трампнинг ўзига қарши танқидлар
Рим папаси АҚШ президентининг ўз манзилига қаратилган охирги сўзларини муҳокама қилмоқчи эмаслигини айтди.
«Мен Трамп маъмуриятидан қўрқмайман ва Инжил хабарини баланд овозларда эълон қилишдан қўрқмайман, чунки мен айнан шу мақсадда бу ердаман, черков айнан шу мақсадда мавжуд. Биз сиёсатчи эмасмиз, ташқи сиёсатга у [Доналд Трамп] тушунадиган нуқтайи назардан ёндашмаймиз», – деган Лев XIV журналистларга Жазоирга учаётган самолёт бортида туриб.
У ўз сўзлари кимгадир қарши ҳужум ҳисобланмаслигини қўшимча қилган.
